Mozilla Foundation aceptou o corrector integrado de galego para o navegador web Firefox e o xestor de correo Thunderbird. Este complemento foi desenvolvido por Dmunhiz e está dispoñible na páxina de descargas de Mozilla buscando pola opción galega gl-es. O dicionario é unha adaptación do dicionario Hunspell desenvolvido por Mancomun.org para OpenOffice.org. Ao tratarse dunha adaptación non están garantidas o 100% das súas funcionalidades aínda que o seu rendemento é case óptimo. O corrector está aberto a melloras que se poden canalizar a través da comunidade Galician Mozdev. A Galician Mozdev é un grupo de tradución de Mozilla ao galego que naceu co obxectivo de traducir ao galego aplicacións da familia Mozilla.
