Hipoiqh é un sistema xeolocalizador que permite localizar a persoas e seguilas por un mapa a través de Internet, levar a nosa axenda xeolocalizada para permitir que nos sigan ou mesmo ver e gravar avisos xeorreferenciados. É gratuíto e universal e funciona con GPS e Internet. Para operar con el só é preciso darse de alta na web como usuario e logo instalar o plugin nos terminais. Este plugin ten unha licenza libre e o código está dispoñible en Source Forge e Google Code .
Hipoiqh foi desenvolvido por un grupo de profesionais galegos que empregan para o seu desenvolvemento PHP, Apache, GNU/Linux e Firefox entre outras ferramentas libres. Coa liberación do plugin pretende acadar unha mellora continua no seu desenvolvemento.
Esta iniciativa é candidata á mellor Startup 2.0 europea, un certame orientado a premiar as webs máis innovadoras.
