Os usuarios do Entrans de Mancomun.org, ferramenta de tradución colaborativa, adaptaron ao galego a versión 2.0 do cliente de correo Thunderbird e a aplicación de calendario Sunbird. Ademais ao traducir esta última aplicación tamén se consegue adaptar ao galego Lightning, utilidade de axenda/calendario para Thunderbird.
Agora mesmo xa se pode descargar a tradución ao galego do Thunderbird 2 , feita coa axuda dos voluntarios do Entrans e máis da comunidade de tradución dos produtos mozilla ao galego. As instrucións de instalación atópanse dispoñibles no Wiki de Mancomun.org…
Proximamente esperamos poder ofrecer o paquete coa tradución para o Sunbird e o Lightning…
Con estas traducións conséguese ter un potente xestor de correo con diversas utilidades libres e en galego grazas ao traballo da comunidade tradutora do Entrans que xa traballou na adaptación doutras aplicacións como o Firefox 2.0 ou a interface OpenOffice.org 2.1. Todo o Software Libre en galego ten cabida no Wiki de Mancomun.org. Podes colaborar a aumentar os seus contidos engadindo novas aplicacións ou información sobre estes programas.
Traducir outro software ao galego
Actualmente está no Entrans o proxecto Gimp 2.0, un xestor de imaxes que constitúe unha boa alternativa a aplicacións como Adobe Photoshop. A tradución do Gimp 2.0 está agora mesmo nun 76.6%.
