DigiD, método de acceso do Goberno neerlandés compartido baixo a licenza EUPL O Goberno holandés utiliza varios métodos de inicio de sesión: verificación por SMS, nome de usuario e contrasinal, lector de tarxetas de identidade e unha aplicación específica (DigiD app), que se presenta como a forma máis sinxela de iniciar sesión de forma segura. Isto débese a que os usuarios xa non teñen que lembrar un contrasinal complicado, senón só un código PIN do dispositivo que elixan.

A aplicación pódese utilizar ata en 5 dispositivos diferentes. O código fonte de DigiD liberouse en GitHub baixo a licenza EUPL, en resposta a unha solicitude en virtude da Lei holandesa de Goberno Aberto. A Lei está en vigor desde o 01-08-2022 e establece que calquera persoa ten dereito a acceder á información creada/posuída polo sector público, sen necesidade de xustificar algún interese lexítimo, agás se son fixadas restricións específicas na Lei.

European Union Public License (EUPL) A colección EUPL céntrase nas licenzas abertas en xeral. Inclúe a Licenza Pública da Unión Europea e moito máis: un asistente de licenzas (JLA) e orientacións para que todos os desenvolvedores, profesionais ou usuarios de TI definan as condicións nas que unha determinada solución pode compartirse e reutilizarse libremente.

As normas claras en materia de licenzas son a base para compartir e reutilizar solucións informáticas, apoiando a interoperabilidade legal. A Comisión Europea publicou a Licenza Pública da Unión Europea (EUPL), que é “a primeira licenza de software libre con valor operativo en todas as linguas oficiais da UE”. Con todo, outras licenzas tamén poden facilitar a compatibilidade ou interoperabilidade das solucións que fan uso delas.

Portal do cidadán checo gov.cz A Axencia Nacional de Tecnoloxías da Información e a Comunicación da República Checa anunciou que utilizará Matomo, unha ferramenta de análise web de software libre, nos sitios web da Administración e no portal do cidadán checo gov.cz. O cambio garante que os datos recolleitos permanecerán dentro da UE. Matomo leva en desenvolvemento desde 2007. Actualmente utilízase en 1,4 millóns de sitios web. A decisión checa de optar por Matomo súmase á doutros países europeos que buscan preservar un maior control sobre os datos dos seus cidadáns. O ano pasado, as autoridades de protección de datos francesas e austriacas consideraron que Google Analytics non cumpría as normas da UE.

Matomo Matomo é unha alternativa a Google Analytics, unha potente plataforma de analítica web que protexe os teus datos e a privacidade dos teus clientes. Sabes onde se almacenan os teus datos e que ocorre con eles, sen influencias externas. Realice un seguimento seguro dos datos persoais dacordo coas leis de privacidade. Obteña un número ilimitado de sitios web, usuarios e segmentos. Tampouco hai limitacións na cantidade de datos que almacena. Navegue facilmente a través dunha interface fácil de usar para obter os datos que necesita, máis rápido.

Caso de éxito

The official portal for European data O portal oficial de datos Europeo, portal xestionado pola Oficina de Publicacións da Unión Europea. Esta oficina é o provedor oficial de servizos editoriais a todas as institucións, organismos e axencias da UE. Un punto central de acceso á lexislación, ás publicacións, ós datos abertos, ós resultados da investigación e outra información oficial da UE. Unha das prioridades do portal é o compromiso coa investigación e a aprendizaxe en materia de datos abertos. Contén casos de uso de datos abertos publicados e reutilizados. Todas as API do portal están documentadas mediante OpenAPI.

Proxecto destacado

OpenAPI Unha máquina pode intercambiar datos en formato dixital. Para facilitar o intercambio de datos, os desenvolvedores definen as API. Estas API poden guiar a humanos e máquinas sobre como interactuar e comprender os datos intercambiados. OpenAPI proporciona unha descrición da interface nunha linguaxe lexible por humanos e máquinas que permite a todo o mundo utilizar as API sen ter que investigar o código fonte. Mediante o uso da sintaxe especificada de OpenAPI, pódense utilizar ferramentas para crear automaticamente documentacións accesibles e lexibles por humanos.

Open Code é un lugar para o desenvolvemento colaborativo e para compartir solucións de software por e para a administración pública. O proxecto foi iniciado polo Ministerio Federal de Interior Alemá e os estados federados de Baden-Württemberg e Rhine-Westphalia. Busca mellorar a transparencia e a reutilización sinxela de solucións de software libre para o sector público. Todo o mundo pode contribuír ao desenvolvemento do software. Isto inclúe a persoal da administración pública, empresas e particulares.

GitLab é unha solución web de software libre de forxa, control de versións e integración continua que axuda ao desenvolvemento de software colaborativo baseada en Git e que ademais tamén ten algunhas funcionalidades de xestión de proxectos integrada. Dende 2014 Gitlab adoptou o modelo de negocio coñecido como “open core” e ten 2 versións distintas, Enterprise Edition e Community Edition, a Enterprise Edition é de pago e ten algunhas funcionalidades máis que a Community Edition. Con GitLab disporemos de control de versións con Git, seguimento de incidencias, revisión de código, integración continua (CI/CD), entre outras.

O Inventario é unha aplicación web que permite xestionar todo o proceso de publicación dun trámite administrativo no inventario da Universidade de Murcia, que se atope instalado, así como a súa baixa. Proporciona unha interface que permite a consulta a portais e aplicacións externas.

Ademais, esta aplicación permite a publicación automática no “Sistema de Información Administrativo (SIA)” da Administración Xeral do Estado (AGE), que actúa como catálogo de información sobre tramitación administrativa de procedementos e servizos dirixidos ao cidadán.

OpenJDK é a versión libre da plataforma de desenvolvemento Java baixo concepto de linguaxe orientada a obxectos. Esta implementación atópase catalogada dentro da licenza GPL de GNU. A súa sintaxe deriva en gran medida de C e C++, pero ten menos utilidades de baixo nivel que calquera delas.

As aplicacións de Java son compiladas a bytecode, que pode executarse en calquera máquina virtual Java (JVM) sen importar a arquitectura da computadora subxacente. OpenJDK é a implementación de referencia oficial desde Java SE 7.