Xa está publicado o número 90 do Boletín de Reutilización de Software Libre nas Administracións Públicas correspondente a este mes de Xaneiro.
O proxecto destacado deste mes en realidade é a conxunción de dous, Nextcloud e Collabora Online, mediante a que se pode montar unha plataforma de produtividade de nube privada con soporte para a edición de ficheiros colaborativos.
No apartado de novas destacamos a publicación de dous números de Mancomún Podcast, a lexislación da Comunidade Europea que favorece a liberación dos seus proxectos ou a condena a desenvolvedores en Italia debido a incumprimento da licenza GPL.
Dende agosto de 2014, a oficina de coordinación de software libre da Amtega vén elaborando e difundido entre os responsables en materia TIC da Xunta de Galicia un boletín, de periodicidade mensual, sobre reutilización de software libre polas administracións públicas. Nel recóllense iniciativas sobre solucións libres, open data e estándares abertos; experiencias de uso de ferramentas libres que se identifican noutras administracións públicas de interese e aplicabilidade dentro da Xunta de Galicia; documentación ou formación de interese nesta materia, etc.
Dende Outubro de 2015, este boletín vense publicando no portal mancomún, co obxectivo de incrementar a difusión desta información noutras administracións públicas, como por exemplo as entidades locais, ou en calquera outra entidade ou organismo que lle poida ser de utilidade.
