A Universidade de Vigo está a levar a cabo unha iniciativa que permite que as persoas maiores podan acceder de xeito máis doado ao computador a través de Linux, concretamente Ubuntu. Xulio Fernández, da ETSE de Telecomunicacións de Vigo, infórmanos desta iniciativa que xorde da súa experiencia como docente para persoas maiores e ver os atrancos cos que se atopan.
As accións máis triviais cun computador poden resultar complexas e traballosas para este colectivo. Unha das máximas do proxecto é que o usuario sexa quen de traballar sempre coa mesma configuración e aspecto gráfico para evitar a toda costa a sensación de estar perdido e ter sempre accesible as webs favoritas ou os seus documentos. O Software Libre demostra que grazas á súa adaptibilidade resulta unha ferramenta estratéxica para a integración de colectivos en risco de discriminación tecnolóxica.
Esta versión de Ubuntu ten como principais características:
- O sistema comunícase co usuario en castelán (xa que as mensaxes en inglés provocan un bloqueo case instantáneo ao non saber o que din).
- O usuario pode ser axudado por terceiras persoas na tarefa de configurar as ferramentas que usa no ordenador. Esas configuracións ademais son portables de xeito que cando as use noutro ordenador estas presenten a mesma aparencia e se comporten exactamente igual en calquera computador no que traballe.
- Permíteselle seleccionar o lugar no que se atopa (casa, traballo, casa do fillo,…) e con só iso ter sempre o mesmo entorno no que el se sabe manexar.
Este proxecto baséase en Ubuntu e inclúe outras aplicacións como Firefox, Thunderbird, OpenOffice.org ou Gimp. Desde a web do proxecto pódese descargar a imaxe ISO do CD Live.
