noviembre 2006 – Página 3

Novos RSS en mancomun.org

Acabamos de implementar uns novos [[RSS]] nas seccións da «Axenda de eventos» e na de «Subvencións» (dentro do Observatorio). Os RSS ou «Marcadores Vivos» permítennos obter resumos de novas das webs que desexemos, con actualizacións das mesmas dende o noso propio navegador ou usando programas externos como lectores de RSS.

Os novos RSS de mancomun.org infórmanche sobre os próximos eventos dispoñibles en Galicia nos próximos 30 días así como das subvencións listadas dende a nosa web.

Estes RSS súmanse así aos xa dispoñibles na portada de mancomun.org e que conteñen as novas da nosa web.

Gluz GNU/Linux, distribución da Universidade de Zaragoza

Está dispoñible a nova distribución de GNU/Linux da Universidad de Zaragoza chamada Gluz GNU/Linux.

Esta nova versión de Gluz está orientada a catro ámbitos: Administración, Ciencias, Humanidades e Enxeñerías, así deste xeito calquera alumno da Universidade pode utilizar esta distribución coma ferramenta de traballo.

Esta distribución vén en formato live-CD para ser utilizada sen ter que instalar nada no ordenador aínda que tamén póde ser instalada.

Os requisitos hardware da Gluz v2 son: Pentium II, 256 MB de memoria RAM e 2GB no caso de facer instalación no disco duro.

Máis información:

Páxina de descargas.
Páxina da documentación.

O Software Libre vai gañando terreo en EUA

Esta semana fíxose público que Sun Microsystems libera, baixo a licenza GPL v2, o código fonte da súa máquina virtual. Cada vez son máis as empresas que apostan polo modelo de negocio baseado en Software Libre.

Segundo un estudio da consultora Forrester de setembro feito en 600 grandes empresas estadounidenses e 300 europeas un 39% das empresas consultadas do vello continente utilizan un ou varios sistemas operativos libres e un 35% en Estados Unidos. Un 8% en EUA e un 5% en Europa plantéxanse facelo en breves e só un tercio declárase en contra.

Outra das empresas que segue a traballar a prol do Software Libre é Red Hat que obtén moito beneficio co mantemento dos seus sistemas operativos. O grupo Oracle, pola súa banda, acaba de anunciar o lanzamento da súa distribución GNU/Linux baseada en Red Hat

As ligazóns seguintes mostran por unha parte o mapa conceptual do Software Libre e por outra banda a evolución das distribucións de GNU/Linux

Mapa conceptual do software libre
Evolución das distribucións GNU/linux

O Concello de Santiago repartirá 500 cd de OpenOffice.org entre as empresas da comarca

Onte o coordinador do proxecto Mancomun.org, Iniciativa Galega polo Software Libre ofreceu unha charla introdutoria sobre Software Libre orientada a empresarios da comarca de Compostela. A Rede de Cooperación Local dependente da Concellería de Promoción Económica do Concello de Santiago organizou este acto que tivo lugar na sede da Asociación de Empresarios do Polígono Industrial do Tambre .

O Concello de Santiago repartirá ademais 500 cd con OpenOffice.org 2.0.4 en galego e cun corrector lingüístico incluído entre as empresas de Compostela e a súa área de influenza. Ademais do OpenOffice.org tamén se obsequiou ás empresas co libre de Jordi Màs Software Libre: tecnicamente viábel, economicamente sostíbel e socialmente xusto.

A Rede de Cooperación Local é unha iniciativa orientada a fortalecer os vínculos entre o contorno produtivo e os xeradores do coñecemento tecnolóxico, de cara a identificar e impulsar iniciativas conxuntas que potencien o desenvolvemento do sector produtivo da comarca e da cidade en base ó potencial tecnolóxico existente.

Drupal 4.7 en galego

O Drupal é un dos CMS ou sistema xestor de contidos máis populares. Nun concurso celebrado recentemente para determinar cal era o mellor CMS de código aberto saíu elixido en segundo lugar despois de Joomla!. Agora acaba de aparecer a versión 4.7 de Drupal en galego.

Foi realizada para a web do Proxecto Trisquel por Nacho Casal Quinteiro, o seu coordinador de tradución, baseandose na versión 4.6. O arquivo pode baixarse de http://trisquel.uvigo.es/pub/locales/gl.tar.gz.

Un tradutor en código aberto recibe o Premio á Mellor Aplicación TIC do ano en Galicia

A Asociación de Enxeñeiros de Telecomunicacións de Galicia decidiu outorgar a imaxin|software o galardón á Mellor Aplicación TIC realizada este ano polo tradutor automático de código aberto Opentrad . Esta aplicación foi desenvolvida por varias empresas e universidades de toda España entre elas a Universidade de VIgo.

O Opentrad permite a tradución bidireccional do castelán ao resto das linguas do estado. O galardón entregarase mañá durante a XI Noite Galega das Telecomunicacións.

Mancomun.org amplía o seu convenio de colaboración con tres LUG máis

Mancomun.org – Iniciativa Galega polo Software Libre vén de ampliar o seu convenio de colaboración cos grupos de usuarios de GNU/Linux de Galicia a tres asociacións máis. Son a Asociación de Amigos da Informática Amigus das Pontes de García Rodríguez, Inestable de Ordes e Compostela Wireless da capital de Galicia. Con esta ampliación Mancomun.org tenta obter unha maior difusión do código aberto por toda a comunidade.

Ata esta ampliación estaban dentro do acordo AGNIX, AULUSC, GALPon, GLUG, GPUL e GULO. O convenio procura a realización de actuacións para o fomento, desenvolvemento e implantación do Software Libre en Galicia. Na imaxe os representantes de Inestable e Compostela Wireless durante a sinatura do convenio.

Preséntase o Plano Estratéxico Galego da Sociedade da Información

Fernando Blanco, conselleiro de Innovación e Industria, presentou con Elena Veiguela, directora xeral de Promoción Industrial e da Sociedade da Información, as principais conclusións do Plano Estratéxico Galego da Sociedade da Información. Grazas a este traballo pódese establecer un diagnóstico fiable da situación das novas tecnoloxías da información e da comunicación na nosa comunidade. Tamén se presentou a web Sociedade da Información que recolle a estratexia para acadar a plena integración na era dixital así coma informes, estatísticas, novas, ferramentas e outros recursos. O Software Libre será unha liña prioritaria na política tecnolóxica da Xunta de Galicia.

O novo plan prevé un investimento público de 800 millóns. A directora xeral asegurou que a falta de interese nos contidos que ofrece a Rede é «un grave problema» que lastra a popularización de Internet en Galicia. Por iso, a Consellería de Industria vai potenciar a xeración de información en galego e próxima aos cidadáns.

Ademais dos contidos, a Xunta aposta pola creación dun parque empresarial para empresas que traballen coas TIC. Veiguela tamén adiantou a redacción dun plan director das telecomunicacións, que se complementaría cun mapa das infraestruturas de telecomunicacións. Ademais, a mandataria sinalou o «posible» lanzamento dun novo Instituto Cartográfico de Galicia.

Prohibido Pensar, Propiedade Privada

Xa está accesible, para libre copia e libre distribución o libro Prohibido Pensar, Propiedade Privada da Fundación Vía Libre.

Este libro mostra as discusións máis relevantes referidas á apropiación monopólica da vida e o coñecemento a través de reximes de patentes e copyrights. Foi editado pola Escuela Marina Vilte, o Programa Argentina Sustentable e a Fundación Heinrich Boell.

Os autores que interveñen neste trabajo son James Boyle, Silvia Rodriguez, Richard M. Stallman, Federico Heinz, Beatriz Busaniche, Bill Joy e as organizacións Grain e FSFLA.

Máis información sobre o libro en educalibre.cl

130 participantes no Concurso de Software Libre

O concurso Universitario de Software Libre organizado pola Universidade de Sevilla conta xa con casi 100 proxectos de 130 participantes espallados por toda a xeografía española.

O obxetivo principal é estimular aos estudiantes universitarios a que participen na creación proxectos de Software Libre, xa que eles son os futuros profesionais da Sociedade da Información

Os premios ascenden a 5.600 euros repartidos entre catro categorías e a entrega destes vaise celebrarar na Escuela Técnica Superior de Ingeniería Informática da Universidad de Sevilla.

Fonte e máis información: concurso-softwarelibre

Joomla! gañou un premio ao mellor CMS en Software Libre do 2006

Despois dunha rolda de nominacións e 8 semanas de votación, a tenda de libros on-line Packt acaba de publicar o gañador do premio ao mellor xestor de contidos en Software Libre do 2006. O premio recaeu en [[Joomla!]], seguido de [[Drupal]] en segundo posto e [[Plone]] en terceiro lugar…

O concurso estaba formado por unha primeira fase de nominación, na cal, calquera visitante da web www.PacktPub.com podía nominar o xestor de contidos que quixera para gañar o premio. De entre todos, os cinco máis votados pasaron á final. Os finalistas (en orden alfabético) foron:

Drupal
e107
Joomla!
Plone
Xoops

De entre estes cinco, o gañador saíu da votación de varios xuíces independentes. Da votación resultou gañador o CMS Joomla!.

Os premios do concurso foron: $5000 para o primeiro, $3000 para o segundo e $2000 para o terceiro.

Fonte orixinal da noticia: http://www.packtpub.com/

Precisamos da vosa axuda para traducir as últimas cadeas do Firefox

O traballo dos voluntarios que se rexistraron na ferramenta de tradución colaborativa Entrans conseguiu que tan só queden por traducir un 23% das cadeas da nova versión do navegador web Firefox 2.0. Precisamos da vosa axuda para ter o antes posible esta valiosa ferramenta no noso idioma o antes posible. É o segundo proxecto de localización de software que se pon no Entrans tralo éxito da tradución OpenOffice.org 2.0.4. A interface deste conxunto de aplicacións ofimáticas foi traducida en tan só dous días aínda que quedan pendentes cadeas da axuda.

A localización do Mozilla Firefox 2.0 partiu da base do traballo de Jacobo Tarrío e comezou hai dúas semanas. Mancomun.org irá introducindo no Entrans de xeito periódico novas aplicacións de código aberto para que os voluntarios as traduzan ao galego.

Finalmente Firebird 2.0

Despois de 2 anos en desenvolvemento, o proxecto Firebird anunciou hoxe oficialmente a tan esperada versión 2.0 do seu software open source de bases de datos relacional durante a sesión de apertura da 4ª Conferencia Internacional do Firebird en Praga, na República Checa…

Fonte: http://www.osnews.com/story.php/16476/Firebird-2.0-Goes-Gold

Sun publica baixo GPL o código de Java

Sun, nun movemento histórico ven de publicar o código fonte da súa implementación de Java Platform Standard Edition (Java SE), Java Platform Micro Edition (Java ME), e Java Platform Enterprise Edition (Java EE) baixo a licenza GNU General Public License version 2 (GPLv2), a mesma baixo a que o propio GNU/Linux está dispoñible para todos.

Xa se empeza a discutir sobre o que esto implicará nas aplicacións Java que se incluirán de serie nas diferentes distribucións, ou sobre o futuro de gcj, o compilador de código fonte Java.

Fonte:DiarioLinux

Nova incorporación á Rede Internacional de Administracións Públicas para o Software Libre

A Oficina Nacional de Gobierno Electrónico e Informática do goberno de Perú acaba de incorporarse á Rede Internacional de Administracións Públicas para o Software Libre. Esta iniciativa busca compartir as experiencias técnicas no eido das políticas públicas das administracións en relación co Software Libre.

Esta agrupación nace a partir da Declaración de Barcelona para impulsar o Software Libre asinada no ano 2004 e que busca promover os retos e oportunidades que plantexa o Software Libre. Os desafíos clasificáronse en sete eidos diferentes: académico, técnico, estratéxico, legal, social, do voluntariado e institucional. En xuño do 2005 constituíuse a rede na que participan diversas administracións públicas de diferentes ámbitos xeográficos e políticos entre as que cabe salientar á Xunta de Galicia.

O MAGASI CD dispoñible en liña

Xa está dispoñible a versión en liña do MAGASI CD desde a web de tal xeito que xa non hai que queimar a imaxe ISO para acceder aos seus contidos. O MAGASI CD é un proxecto de Manuel González Regal, profesor do Ciclo Formativo de Grao Superior de Administración de Sistemas Informáticos (ASI) do I.E.S. Xulián Magariños de Negreira, que pretende ser un achegamento das Tecnoloxías da Información e da Comunicación (TICs) á comunidade escolar galega, inspirado en proxectos coma The Open Source Free CD e The OpenCD Project .

Entre as novidades do MAGASI CD hai que salientar:

– O acceso en liña permite acceder a todo o mundo ao contido do MAGASI sen ter que descargar e queimar a imaxe ISO.
– Permite actualizar o contido do MAGASI dun xeito máis rápido e sinxelo: na versión en liña vaise comezar un proceso de actualizacións para ter sempre as últimas versións dos programas e incluír novos programas; en cambio, a imaxe ISO actualizarase cando existan cambios significativos.
– No MAGASI en liña é posible navegar en galego ou en castelán, para facilitar o seu uso ao alumnado inmigrante ou ás persoas interesadas que non sexan galego falantes.

Compartir:

Compartir:

Compartir:

Compartir:

Compartir:

Compartir:

Compartir:

Compartir:

Compartir:

Compartir:

Compartir:

Compartir:

Compartir:

Compartir:

Compartir:

Compartir: