A Biblioteca Británica quere mellorar o seu sistema de arquivo de código aberto, Web Curator Tool. Para este fin, sacou un concurso a nivel europeo o pasado mes de agosto en que solicitaba especialistas para axudar coas novas funcionalidades e corrixir os erros nesta aplicación de código aberto. O contrato está valorado en 60.000 GBP (uns 88.000 euros).
Para explicar porque a biblioteca está a empregar unha licenza de código aberto para desenvolver esta ferramenta, Derek Farmer, o encargado da seguranza informática da Biblioteca Británica lembrou que esta é membro fundador do «International Internet Preservation Consortium». A ferramenta Web Curator Tool está a se desenvolver baixo o seu auspicio. “Un dos obxectivos deste consorcio é fomentar o desenvolvemento e o uso de ferramentas, técnicas e estándares comúns para a creación de arquivos internacionais”.
Segundo Farmer, a Web Curator Tool non é a única ferramenta de código aberto desenvolvida ou usada pola Biblioteca Británica, pois o centro, emprega tamén un importante número de aplicacións de código aberto.
Por exemplo, está a empregar GNU/Linux, Apache e Tomcat. Ademais, a Biblioteca usa Heritrix, robot de código aberto para o rastrexo de sistemas de arquivo web, a aplicación «Wayback Machine» (máquina do tempo) dentro do proxecto Archive, que se dedica a recoller a evolución das páxinas da Internet ao longo do tempo.
De acordo coas regras de adquisición de software, a Biblioteca Británica sempre considerará tanto o software libre como o privativo ao se basear na política oficial do país.
Ligazón á nova en IDABC: British Library to improve its Open Source web archive system
