Entrans é unha ferramenta de tradución colaborativa que permite que grupos de voluntarios traballen na localización de software. Grazas ao Entrans de Mancomun.org os voluntarios traduciron ao galego Firefox 2.0 e a interface de OpenOffice.org. A nova versión xa está accesible e alí iranse colgando as nosas propostas de tradución. Coma primeiro proxecto incluímos o sistema de publicación multi-blog b2evolution. Esta aplicación será empregada como exemplo no curso de Entrans que convoca a Consellería de Educación. Entre as novidades máis destacadas está a inclusión de foros e dunha listaxe dos proxectos xa realizados. Periodicamente iranse engadindo novos proxectos a esta plataforma. Outros colectivos adicados á adaptación das aplicacións informáticas ao galego coma Ciberirmandade da Fala tamén empregan esta tecnoloxía.
