O Software Libre é seguro, achega calidade, baséase en estándares abertos, ten liberdade para utilizarse en calquera sitio, favorece a cultura da colaboración, aumenta a capacidade tecnolóxica, proporciona aforro de gastos en informática, reduce a dependencia de provedores e fomenta o desenvolvemento da empresa local.
Estes son algúns dos argumentos que se expuxeron na xornada Sourcepyme, un encontro tecnolóxico organizado polo “Instituto Tecnológico Metalmecánico (AIMME)”, o “Instituto Tecnológico del Plástico (AIMPLAS)” e o “Instituto Tecnológico de Informática (ITI)”, no que se deron cita máis de 200 expertos para reflexionar sobre as numerosas vantaxes que o Software Libre pode achegar ás empresas da Comunidade Valenciana…
A xornada tamén serviu para demostrar, baseándose nos resultados dunha enquisa realizada por
Sourcepyme, que a maioría das PEME valencianas fan uso do Software Libre na súa empresa atendendo a criterios de fiabilidade e seguridade e valorando, sobre todo, o seu menor custo e o feito de non estar ligados a un único provedor. Con todo, os enquisados tamén revelan que a dispoñibilidade do sistema, o descoñecemento das capacidades das aplicacións, o temor a un cambio e a dúbida por un escaso soporte ou mantemento son, para eles, algúns dos hándicaps deste software, tal e como explicou Eduardo Requena, responsable do departamento TIC de AIMPLAS.
O Software Libre é, sen dúbida, unha oportunidade nova para as empresas da Comunidade Valenciá. Ante esta circunstancia, segundo o director de AIMME, Salvador Bresó, o papel dos institutos tecnolóxicos é o de actuar de elemento de difusión de todas aquelas vantaxes que as novas tecnoloxías poden ofrecer ás empresas, pois, na súa opinión, “os centros tecnolóxicos teñen que aproximar a ciencia e os avances tecnolóxicos ás empresas”.
Duroty é un servizo de xestión do correo electrónico, feeds persoais e de ligazóns orientado á peme e a redes estables licenzado baixo GPL. Foi desenvolvido por un colectivo de Barcelona que pretende desenvolver un proxecto con prestacións similares a gmail en código aberto.
