A Universidade da Coruña acollerá o 26 de marzo de 2026 unha nova sesión de GPUL School titulada Imprimiendo la ciencia: descubre la impresión 3D, un obradoiro introdutorio organizado polo Grupo de Programadores e Usuarios de Linux (GPUL) e impartido polo colectivo de divulgación científica UDCbigbang.
A actividade busca achegar ao público os fundamentos da impresión 3D e o seu valor como ferramenta para a investigación, a enxeñaría e a comunicación científica.
Ao longo da sesión explicarase como se preparan os modelos dixitais e como se transforman en pezas físicas mediante tecnoloxías de impresión en resina. As persoas participantes poderán coñecer de primeira man o proceso completo: desde o tratamento dos arquivos ata a súa impresión capa a capa, comprendendo as posibilidades que esta tecnoloxía ofrece para visualizar e materializar contidos científicos de maneira accesible.
O obradoiro desenvolverase nun formato práctico, pensado para persoas sen experiencia previa pero con interese por aprender a empregar estas ferramentas no seu ámbito académico, profesional ou divulgativo. A actividade é gratuíta e aberta ao público xeral, mais require inscrición previa a través da web de GPUL.
Poderás atopar máis información na seguinte ligazón: GPUL – Imprimiendo la ciencia: descubre la impresión 3D
