O equipo de desenvolvemento da distribución Scientific Linux acaba de lanzar o seu Live CD 5.0 para arquitecturas i386 e x86_64 como xa fixeran con Live DVD 5.0 hai menos dun mes. Scientific Linux é unha distribución baseada en Red Hat Enterprise Linux 5 mantida polos prestixiosos centros de investigación Cern e Fermilab ademais de contar coa participación das máis prestixiosas universidades.
O principal obxectivo de Scientific Linux é achegar un sistema operativo común para os investigadores e evitar duplicación de esforzos. Este proxecto pretende ser totalmente compatible con Red Hat Enterprise Linux cun mínimo número de adicións e cambios.
A distribución inclúe entre outras características un kernel Linux 2.6.18, escritorio GNOME 2.16.0, OpenOffice.org 2.0.4 ou un escritorio 3D con Compiz e AIGLX. Podedes descargar a imaxe ISO e ver capturas de pantalla nesta web.
