Hai aproximadamente un ano, a Dirección Xeral de Promoción Industrial e da Sociedade da Información a través de Mancomún convidou ás empresas TIC galegas a participar nunha xornada de traballo sobre o DVD Ferramentas informáticas para a PEME. O obxectivo era achegar ao empresariado galego unha recompilación de ferramentas informáticas de licenza libre que cubrisen as súas necesidades comúns. O noso DVD da PEME está a piques de cumprir o seu primeiro ano de vida polo que é un momento axeitado para facer balance do éxito acadado e debater a estratexia para continuar polo bo camiño.
Para levar a cabo esta análise, nada mellor que contar novamente cos implantadores de SwL galegos e coñecer así, de primeira man, se as aplicacións actuais do DVD responden plenamente ás necesidades da peme galega e recoller as súas propostas sobre aplicacións candidatas a seren desbotadas ou cales deberían incluírse.
Por isto, celebrarase unha xornada de traballo, no vindeiro mes de Novembro, cos axentes directamente involucrados no proceso de implantación do SwL. Consecuentemente, e á espera das conclusións desta xornada, o DVD da PEME manterase conxelado, é dicir, non se realizarán novas actualizacións.
Calquera suxestión ou comentario sobre o DVD será ben recibido, podedes enviárnolo,a soporte @ mancomun . org.
