Felipe Gil Castiñeira, coordinador do equipo de tradución de Ubuntu ao galego, fixo un chamamento estes días entre os Grupos Galegos de Usuarios de Software Libre para a participación no LoCo Team galego, que os tradutores desta distribución levan forxando desde hai meses.
Un LoCo Team ou Comunidade Local ten como obxectivo axudar a promover, traducir, desenvolver e, en definitiva, mellorar Ubuntu, dentro da actividade dunha rexión concreta. A meirande parte dos LoCos teñen proxectos como a tradución ou a personalización de Ubuntu para as súas áreas específicas.
Concretamente o novo equipo galego reza o seguinte entre os seus obxectivos: divulgar o GNU/Linux Ubuntu e apoiar quen o utilice, e contribuír para a creación dun GNU/Linux Ubuntu que inclúa as marcas culturais galegas (idioma, símbolos, eventos…).
Os LoCos non teñen como propósito reemprazar nin solapar a labor desenvolvida polos Grupos de Usuarios de Linux (LUG), senón complementalos. Segundo esta idea, Felipe Gil propón que o LoCo “sirva como apoio para aquelas actividades que utilicen a a distribución Ubuntu (cursiños, festivais de instalación…) que organicen os GGULS, Oficinas de Software Libre ou calquera outro grupo, entidade ou asociación.”
O LoCo Team galego xa ten estabelecidos a infraestrutura básica (páxina web, foro,wiki…), restando só a constitución do colectivo de membros. A este respecto, o equipo do LoCo Team está aberto á participación de calquera entidade vencellada ao software libre en Galicia: GGUL, organizacións, asociacións…
Máis información na web do proxecto.
