Con motivo das celebracións do Document Freedom Day, que ten lugar hoxe por segunda vez, a Oficina de Software Libre da Universidade de Santiago de Compostela acaba de crear un equipo galego do proxecto Document Freedom Day.
Baixo este grupo, que ten como obxectivo fomentar entre a poboación o uso de formatos estandarizados, libres e abertos e que garantan a interoperabilidade, a OSL traduciu todo o material gráfico da actual campaña 2009, así como o sitio web no que se difunde a iniciativa -traballo no que está xa a colaborar activamente Mancomún-.
A web pretende consolidar un equipo local que integre a rede mundial xa existente e que, dende Galiza, coordine as actividades realizadas cada último mércores de marzo no Document Freedom Day. Esta celebración complementa no calendario ao Software Freedom Day.
A maiores, a OSL libera hoxe un tríptico formativo sobre a importancia dos estándares e formatos abertos e libres. O documento forma parte do material elaborado para empregar na próxima campaña pública da Oficina, que durante o vindeiro mes de abril percorrerá as diversas facultades e escolas da Universidade co programa de Puntos de Información nas Facultades (PIF), aconsellando o uso de sistemas operacionais e formatos libres e abertos.
O material empregado para a súa elaboración pode descargarse na sección de anexos da web da Oficina de Software Libre .
