O programa foi elaborado coa aplicación libre de animación en 3D, Blender
Investigadores da Universidade de Almería traballan no desenvolvemento dun simulador en tres dimensións co que se poderá detectar futuras condutas relacionadas co consumo de sustancias, trastornos mentais e acoso escolar no ámbito educativo. Con esta finalidade constituíuse un equipo multidisciplinar, dirixido por Adolfo Javier Cangas, no que colaboran membros da Unidade en Enxeñaría en Computación Gráfica do grupo de investigación en Informática Aplicada (dirixido por Luís Iribarne) e diferentes especialistas da psicoloxía e a psiquiatría.
Para iso os expertos da UAL desenvolveron un programa de computador que recrea diferentes conflitos presentes nos centros educativos e algunhas situacións dos lugares de lecer e o ámbito familiar. Os participantes deben seleccionar entre diferentes alternativas a que representa mellor a súa forma habitual de comportarse. O obxectivo é atopar como reaccionan os mozos ante este tipo de situacións e se as están vivindo ou non.
O proxecto, financiado polo Ministerio de Sanidade e Consumo, iniciouse a principio de novembro de 2007 e na actualidade recreáronse dez dos quince escenarios que comporá finalmente o programa informático, que terá unha duración aproximada de vinte e cinco minutos. Posúe unha versión en función do xénero e, cando estea finalizado, preténdese aplicalo a uns tres mil escolares de diferentes centros educativos. Na súa elaboración utilizouse o programa de software libre BLENDER, facilitando con isto que o simulador 3D poida ser utilizado en calquera tipo de computador e sistema operativo.
