A Vicerreitoría de Novas Tecnoloxías e Calidade e a Vicerreitoría de Formación e Innovación Educativa organiza o vindeiro mes de maio no campus de Vigo un curso de introdución ao programa de álxebra computacional, Maxima. As clases impartiranse entre os días 4, 5 e 6 de maio en horario de 16 a 20h e o 7 de maio de 16 a 19h.
O curso “Introdución a Maxima, software libre de cálculo simbólico” está dirixido a todos os profesores e profesoras da Universidade de Vigo dentro do programa de accións formativas institucionais da Universidade de Vigo para o ano 2009.
O obxectivos do seminario centraranse na aprendizaxe básica do código do aplicativo e dos seus fundamentos, pero tamén no uso xenérico do software libre.
Ofertaranse un total de 20 prazas que se irán cubrindo por rigorosa orde de preinscrición a través da plataforma Bubela. O período de matrícula permanece aberto ata o vindeiro día 30 de abril.
Podes consultar máis información do curso no enderezo de Bubela.
Cálculo simbólico con software libre, Maxima e MaxWeb
Maxima é un sistema para a manipulación de expresións simbólicas e numéricas, incluíndo diferenciación, integración, expansión en series de Taylor, transformadas de Laplace, ecuacións diferenciais ordinarias, sistemas de ecuacións lineais, e vectores, matrices e tensores. Maxima produce resultados con alta precisión usando fraccións exactas e representacións con aritmética de coma flotante arbitraria. Adicionalmente pode graficar funcións e datos en dúas ou tres dimensións.
O código fonte de Maxima é libre e está accesíbel no administrador de arquivos de SourceForge.
Este feito permitiu realizar constantes melloras no aplicativo, así como o desenvolvemento doutros complementarios a este. Entre a comunidade de software libre galega, por exemplo, Rodríguez Riotorto desenvolveu MaxWeb 2.0.0, unha interface web para o programa de cálculo Maxima.
Maxweb é un contorno web en php para a creación de interfaces entre o servidor Apache e o programa de cálculo simbólico e numérico Maxima. A finalidade do programa está orientado a solventar os problemas derivados do descoñecemento da linguaxe de Maxima, ofrecendo unha interface web capaz de achegar doadamente os contornos de cálculo matemático.
Estas características fan do aplicativo unha ferramenta idónea para o ámbito educativo, tanto no desenvolvemento de actividades interactivas -a través do navegador- como para mostrar conceptos matemáticos. Dadas as rutinas avanzadas de que dispón, o aplicativo tamén pode ser empregado no eido da investigación e no técnico profesional.
