Ao longo do vindeiro ano académico, e con vontade de continuidade, a oficina desenvolverá tarefas de formación, asesoramento e implantación do Software Libre na universidade: conferencias, xornadas, unha análise do estado do software na universidade, guías de boas prácticas e de uso de estándares de comunicación abertos e libres serán algunhas das actividades levadas a cabo.
A apertura deste servizo para a comunidade universitaria compostelana afonda nos compromisos da administración galega co Software Libre, xa materializados en anos anteriores en proxectos de tradución, colaboracións con asociacións de usuarios ou a creación do Centro de Referencia e Servizos de Software Libre de Galiza, Mancomún.
Para a Universidade, este movemento representa un paso na dirección dunha maior autonomía dos provedores tradicionais de software, así como a adopción dunhas tecnoloxías máis abertas, accesibles e estandarizadas. Para profesores, investigadores, persoal administrativo e alumnos significará a posibilidade de ter software traducido ao seu idioma, adaptado ás suas necesidades e que, como valor engadido, poderán levar canda si e empregar noutros ámbitos persoais ou profesionais.
O Software Libre
Baixo o nome de “Software Libre” atopamos aplicacións que poden ser copiadas,modificadas e adaptadas libremente. Axilidade de desenvolvemento, transparencia no que fan os programas, eficiencia económica e autonomía para usuarios e desenvolvedores son os argumentos que dan os defensores deste modelo, que describen como “tecnicamente viable, economicamente sostible e socialmente xusto”.
Exemplos de éxito de aplicacións libres son a suite de ofimática OpenOffice.org ou o navegador Mozilla Firefox, cuxa versión 3.0, recentemente liberada, ven de establecer o record mundial do programa máis descargado. GNU/Linux, o sistema operativo libre máis popular, é empregado regularmente por millóns de persoas nos seus ordenadores, así como por entes como a NASA, no acelerador de partículas do CERN ou nos supercomputadores máis potentes do mundo.
Nos últimos anos, o software libre está a vivir un auxe a nivel mundial, con administracións, empresas, asociacións e particulares de todos os continentes interesados nel e nas súas posibilidades. No caso galego pódese falar dunha auténtica idade dourada, con máis de dez asociacións de voluntarios adicadas á súa promoción, un crecente número de empresas que o empregan ou basean o seu modelo de traballo nel e unha paulatina introdución no ensino medio e superior e na administración.
