VideoLAN ven de anunciar a nova versión do reprodutor multimedia máis completo do mercado, o VLC, que ademais de ser libre é multiplataforma, contando con soporte para Windows, macOS, iOS, Android, GNU/Linux, BSD…
A versión 3.0, co nome clave Vetinari acaba de ser liberada e esta conta cunha morea de novas funcionalidades, alén dos máis de 1500 erros solucionados, entre as novidades que salientamos están: Activación por defecto da decodificación por hardware, permitindo definicións UHD (4k e 8k); visualización de vídeos 360º; soporte de profundidade de cor de 10 bits, proporcionando así HDR; soporte de streaming a Chromecast; reprodución de menús Blue-Ray Java (BD-J) e tamén o VLC poderá recorrer a rede local para atopar ficheiros multimedia compartidos para reproducilos.
Se queredes ver a lista completa de novidades así como descargar a nova versión, podedes facelo na páxina do anuncio.
