AGASOL continúa co seu periplo de promoción de solucións tecnolóxicas de SwL por Galiza

A Asociación de empresarios presentou onte as súas propostas na Confederación de Empresarios de Ourense

Ourense A Asociación de Empresas Galegas de Software Libre (AGASOL) presentou onte, por terceira ocasión, a sesión informativa “Software Libre contra a crise”, co que o colectivo empresarial vén recorrendo as principais cidades galegas para dar a coñecer ao sector empresarial as vantaxes das tecnoloxías abertas. A xornada, que transcurriu nesta ocasión na Confederación de Empresarios de Ourense, reuniu a máis de 40 persoas procedente do tecido empresarial ourensá, así como de entidades locais vencelladas ao sector.

O encontro, enmarcado no programa de actuacións previsto por Agasol en virtude do convenio subscrito coa Dirección Xeral de Promoción Industrial e da Sociedade da Información, foi presentado por Emilio González Iglesias, directivo da Confederación de Empresarios de Ourense, quen agradeceu a actividade de Agasol como “vehículo impulsor e referente tecnolóxico para ofrecer solucións ás PEMES ourensás”.

Xunto a Emilio González estivo o delegado provincial da Consellaría de Innovación e Industria, Antón Jardón Dacal, cuxa intervención orientouse a salientar a importancia de iniciativas coma esta, enmarcadas dentro do Plano Estratéxico Galego da Sociedade da Información (PEGSI) e artelladas a través de proxectos como o de Mancomún. Así mesmo, destacou a labor realizada pola Rede de Dinamización da Sociedade da Información, a cal, explicou, “está a facer un gran traballo de cara ao emprego de tecnoloxías abertas na sociedade galega”.

A xornada concluiu coa charla de Roberto Brenlla, quen representando á Asociación AGASOL como membro de TEGNIX, destacou a relevancia do emprego de estándares abertos para cumprir coa legalidade e a transparencia nas entidades públicas e privadas. Ademais explicou algúns dos modelos de negocio que teñen as empresas TIC provedoras de servizos xunto ao contorno
legal que implica o emprego de diferentes licenzas.

O ciclo de conferencias de Agasol continuará en vindeiras xornadas nas cidades de Lugo e Pontevedra.

Fonte: Agasol

Compartir: