Agasol organiza o evento “LibreTeo, Software libre. Cultura libre. Coñecemento libre” en colaboración co Concello de Teo, Melisa, GALPon, Comunidade O Zulo, Boa idea, Orienta Galicia e Imaxin software.
A filosofía detrás deste evento é achegar ao público de xeito sinxelo os diferentes aspectos da cultura libre. Será posible coñecer xente que traballa ou constrúe software libre; xente que comparte a idea de que a cultura faise entre todos, e gusta de crear e compartir as súas creacións; e xente que comparte os seus coñecementos e desfruta facéndoo convencida de que o coñecemento compartido chega máis lonxe.
O evento terá lugar o 30 de abril no Auditorio da Ramallosa do Concello de Teo.
En palabras da organización, trátase dun evento “centrado na liberdade das persoas e o tremendo potencial que ten a xente cando colabora en proxectos libres. Con propostas e referencias nos sectores do software, a cultura e o coñecemento. Todas as charlas e obradoiros están dirixidos a todos os públicos, cunha linguaxe sinxela e sen tecnicismos”.
Programa provisional
Polo momento o programa aínda é provisional pero conta xa cunha serie de relatorios de interese do ámbito do software libre, cultura libre e coñecemento libre como reza o título da xornada.
- Edición de vídeo para todos. Iñaki Quenerapú — Boa Idea.
- Produción musical con software libre Miguel A. Rodríguez Muíños — Melisa e Comunidade O Zulo
- Imaxes en acción Jorge Lama — Melisa
- A historia da Kernel de Mugardos Alberto Permuy — Comunidade O Zulo
- Hackcesibilidade Fátima García Doval — Discapacitodos
- Distribucións de Linux lixeiras e para cativos Miguel Bouzada — GALPon e Comunidade O Zulo
- Orienta Galicia: actitude Ubuntu Marta Romeo — Orienta Galicia
- Software libre nos centros penitenciarios galegos Rafa Gaioso — Melisa
- Humor e música (peche do evento) Víctor Grande
Ademais haberá obradoiros para toda a familia que aínda non están pechados, pero que contan con anunciar en breve.
A asistencia ao evento é de carácter totalmente gratuíto previa inscrición.
Colaboración
Por outra parte a organización solicita a colaboración da xente a fin de organizar a un grupo de voluntarios/as xa que haberá moito que facer aquel día.
Os interesados en colaborar poden contactar coa organización a través do correo electrónico contacto @ libreteo . org indicando a súa dispoñibilidade durante o 30 de abril e días anteriores.
