Coincidindo coa presentación do Plan de Software Libre para o ano 2013 o pasado luns 8 de abril, o Observatorio da Sociedade da Información e a Modernización de Galicia (OISMGA) publicou os informes sobre o nivel de implantación do “Software Libre nas pequenas e medianas empresas de Galicia” e do “Software Libre nas empresas informáticas de Galicia” correspondentes ao ano 2012.
Un dos principais obxectivos desta análise ademais de comprobar a evolución da oferta e da demanda de solucións libres nas empresas de Galicia, é detectar cales son as necesidades das empresas neste eido a fin de aliñar as actuacións que a administración pública inclúe no Plan de acción en materia de Software Libre dirixidas ao ámbito empresarial co obxectivo de incrementar a eficiencia e produtividade do sector grazas ás TIC e particularmente ao Software Libre.
Uso do software libre nas empresas galegas
Os resultados obtidos nos estudos demostran que a tendencia no uso do software libre continúa a ser moi positiva tanto nas empresas informáticas como nas do resto de sectores produtivos.
Un 82% das empresas informáticas de Galicia utiliza solucións tecnolóxicas libres nos seus equipos. Un 73,9% das empresas do resto de sectores produtivos, de 10 a 249 empregados, que non son persoas físicas, empregan Software Libre o que supón que o grao de penetración nestas empresas alcanza xa un nivel case parello ao das empresas informáticas.
Podemos dicir de forma global que aproximadamente oito de cada dez empresas galegas empregan Software Libre nos seus equipos.
Obsérvase ademais unha madurez neste mercado, xa que non só se emprega máis Software Libre, senón que comeza a apreciarse tamén un descenso no uso do software privativo. Aínda que o uso deste último permanece como maioritario entre as empresas, tanto no que se refire a sistemas operativos (76,4%) como aos aplicativos (84,1%), percíbese unha tendencia positiva cara o Software Libre.
Cabe destacar que atendendo ao uso de sistemas operativos nos ordenadores de escritorio por parte das empresas constátase un incremento de 13,1 puntos porcentuais no uso do S.O. Libre acompañado dun descenso de 15,1 puntos porcentuais no uso de S.O. Privativos.
No caso das empresas TIC hai un incremento aínda maior no uso de S.O libre, de 24,4 puntos porcentuais aínda que non vai acompañado dun descenso significativo no uso do S.O privativo. A tipoloxía de S.O empregado nos servidores presenta unha tendencia moi similar.
Atendendo á evolución no uso de aplicativos libres nas empresas e empresas TIC tanto nos ordenadores como nos servidores, apréciase a mesma tendencia positiva de incremento. Nesta caso só se aprecia un significativo descenso no uso de aplicativos privativos no caso dos servidores das empresas non pertencentes ao sector TIC.
Os aplicativos con licenza libre máis empregados polas empresas son o navegador de Internet, ofimática, o xestor de correo, antivirus e seguidade e os programas de xestión empresarial. Todos eles con maior porcentaxe no caso das empresas informáticas. Destacar que nestas empresas, o uso do software libre supera ao privativo nos aplicativos de xestión de contidos web, de traballo en grupo, de educación a distancia e desenvolvemento de software.
En canto ao nivel de satisfacción polo uso do software libre acada unha nota de 7,7 no caso das empresas informáticas e dun 6,7 nas do resto de sectores produtivos.
En xeral estas tendencias apuntan a que as empresas teñen xa un importante grao de confianza na calidade e utilidade das solucións libres tanto para os ordenadores de usuario como para os servidores aínda que queda moito camiño por percorrer.
Oferta de produtos software libre
No que respecta á oferta de Software Libre por parte das empresas TIC galegas, algo máis da metade das empresas inclúen o Software Libre na súa carteira de produtos, o que supón un lixeiro estancamento no número de empresas que ofertan produtos ou servizos ao redor de tecnoloxías libres.
Das que non ofrecen aínda Software Libre o 44,6% aínda non o consideraron e o 50,9% non teñen claro se facelo lles podería reportar beneficios tanxibles por elo. Destes datos pode concluírse que hai un descoñecemento importante sobre os modelos de negocio no Software Libre.
Motivos para non usar Software Libre e accións demandadas para promovelo
A principal barreira entre os clientes das empresas informáticas para a incorporación do software libre é o descoñecemento ou a falta de información, manifestada por un 48,1% das empresas consultadas. No actual contexto económico, o custo (no 76,5% dos casos) é o factor mellor valorado polos clientes sobre a conveniencia de incorporar software libre no seu negocio.
Os motivos máis sinalados polas empresas que non usan o Software Libre continúan sendo o descoñecemento ou falta de información, a complexidade ou o risco ante o cambio, a falta de formación ao respecto e a falta de provedores ou soporte.
As actuacións máis demandadas polas empresas para incentivar o uso do Software Libre: a potenciación de demostracións de funcionamento, asesoramento no caso concreto de cada empresa, axudas ou subvencións para a súa implantación ou formación aos usuarios. Constátase un lóxico paralelismo entre as accións demandadas e os motivos indicados para non usar Software Libre.
Co obxectivo de responder a esta demanda, dende a AMTEGA en colaboración cos diversos axentes do ecosistema de software libre galego e a través da Rede CeMIT, do Centro demostrador TIC e outros servizos públicos dispoñibles levará a cabo unha serie de actuacións para o fomento do software libre no sector empresarial como por exemplo, a celebración de xornadas de demostración e formación no CDTIC, a formación a profesionais a través do CNTG, servizo de soporte de primeiro nivel a través da Oficina de Coordinación de Software Libre, do CDTIC e de AGASOL …
Nas seguintes ligazóns pode consultarse en detalle tanto os informes como Plan de acción en materia de Software Libre do ano 2013:
- Resumo Executivo "Software Libre nas empresas informáticas de Galicia"
- Informe "Software Libre nas empresas informáticas de Galicia"
