Mancomún intervirá no encontro cunha presentación do metapaquete Araos
Os amantes da informática teñen este fin de semana unha cita inexcusable na cidade de Lugo, onde, dende esta tarde e até o vindeiro 8 de decembro, terá lugar a Ludus Party .Net 2008. A terceira edición deste encontro prevé reunir na Feira de Mostras e Exposicións de Lugo a preto de 650 persoas, as cales poderán participar dos obradoiros, xogos, concursos e conferencias preparadas pola organización.
O software libre, como en anos anteriores, terá un apartado de especial relevancia. O Centro de Referencia e Servizos de Software Libre de Galiza participará no encontro para impartir unha charla sobre oa adaptación de Ubuntu GNU/Linux do araOS. Óscar García, técnico e desenvolvedor de Mancomún, achegará aos asistentes as características técnicas do produto, pero sobre todo o seu valor de usabilidade.
Tamén no apartado de tecnoloxías libres artellarase unha batalla con “Real Time Battle”, un xogo de intelixencia artificial no que se debe programar o comportamento dun robot para que loite contra outros, programados á súa vez por outras persoas.
Ademais do software libre, a Ludus Party .Net 2008 abordará outros temas como a arte dixital, o hardware, a dobraxe de películas, Livemotion ou Air Guitar. Tamén terán lugar presentacións de produtos, xogarase a títulos coma Counter Strike, Mario Kart Wii, PES 2009, Quake III Arena, Warcraft III e Trackmania, e mesmo se agarda un concerto do DJ lugués Dr. Think.
