Logo do descanso estival, GALPon retoma o novo curso organizando a III xornada dos Sábados Libres na Altamar, coa colaboración coa Asoc. Xuvenil Altamar e grazas á cesión de espazos por parte da Residencia Altamar.
O vindeiro sábado 28 de setembro , coincidindo co 30 aniversario de GNU, GALPon organiza o curso Vim + Bash, iniciación á programación con “bash scripting”.
No curso farase durante a mañá a introdución a Vim, un versátil editor de ficheiros de texto, cunha gran flexibilidade á hora de escribir scripts e á tarde será a quenda de introducirse na programanción de Bash, o intérprete de rodes predeterminado da maioría de distribucións GNU/Linux.
A participación e asistencia a este obradoiro é de carácter gratuíto, e está aberta ao público en xeral. Para evitar problemas de aforo é imprescindible formalizar unha inscrición na correspondente folla de inscricións.
Como en anteriores ocasións, a organización agradece tamén que aquelas persoas que se inscriban o indiquen tamén na páxina do «Evento en G+» nas opcións «Si» ou «Quizais» da consulta «Vas asistir?»
A programación completa é a seguinte:
- Primeiro bloque (mañá): Iniciación a Vim
- Interface modal
- Ordes de desprazamento
- Ordes de manipulación de texto
- Usando o sistema de axuda
- Xanelas e búferes
- Configuración
- Engadidos
- Segundo bloque (tarde): Iniciación a Bash. Nota: todos os exercicios realizaranse con «vim» como editor.
- Definición e asignación de variábeis
- Estruturas de control «case», «if», «select»
- Bucles «for», «while» e «until»
- funcións, …
Esta actividade forma parte das actividades que GALPon realiza ao abeiro do convenio de colaboración asinado coa Axencia para a Modernización Tecnolóxica de Galicia (AMTEGA), e incluídas no Plan de Acción de Software Libre 2013 da Xunta de Galicia.
