- A AMTEGA continúa desenvolvendo accións de achegamento das TIC en Software Libre ao sector empresarial co obxectivo de promover que as empresas sexan capaces de utilizar as TIC para ser máis eficientes, aumentar a súa produtividade e innovar.
- O CDTIC acollerá nos próximos meses un ciclo de seminarios prácticos de solucións empresariais en Software Libre, organizado conxuntamente coa Asociación Galega de Empresas de Software Libre (AGASOL). Un total de 8 solucións empresariais serán presentadas ao longo de 32 horas.
- Esta nova actuación comparte os obxectivos da Guía de solucións TIC en Software Libre para profesionais autónomos e o Programa de Asesores Tecnolóxicos presentados nas últimas semanas.
Dentro da estratexia de promoción do Software Libre no ámbito empresarial, a AMTEGA promove a celebración dun ciclo de seminarios prácticos de solucións empresariais en software libre, dirixido ás pequenas e medianas empresas galegas.
Poderán coñecer de forma práctica as vantaxes do uso de Sistemas de Xestión Empresarial (ERP), de Relacións cos Clientes (CRM), Xestión Documental, Xestión de Contidos (CMS), Comercio electrónico, Xestión de rede, Cloud e traballo en grupo. Estes seminarios celebraranse no Centro Demostrador TIC durante os meses de Outubro e Novembro.
Esta actuación comparte os obxectivos da Guía de solucións TIC en Software Libre para profesionais autónomos e o Programa de Asesores Tecnolóxicos: promover que as empresas e profesionais galegos sexan capaces de utilizar as TIC para ser máis eficientes, aumentar a súa produtividade e innovar.
O pasado 18 de setembro a AMTEGA presentou tamén no CDTIC a Guía de solucións TIC en Software Libre para profesionais autónomos elaborada en colaboración coa Asociación Galega de Empresas de Software Libre (AGASOL) e a Federación de Autónomos de Galicia (FEAGA), na que se fai un percorrido por solucións libres dirixidas a micropemes e profesionais autónomos. Esta guía compleméntase cun asesoramento de primeiro nivel por parte de AGASOL.
Nesta mesma liña, o día 26 de setembro presentouse o Programa de Asesores Tecnolóxicos do CPEIG, polo que as empresas seleccionadas para participar nel recibirán un asesoramento particular dos Asesores TIC do programa que lles elaborarán un Plan Director no que se recollerá cales son as áreas nas que poderían mellorar co uso das solucións tecnolóxicas, onde se dará preferencia ao software libre.
Con este ciclo de seminarios, vaise un paso máis alá, xa que o seu obxectivo é achegar dun xeito totalmente práctico as funcionalidades e vantaxes das diferentes solucións tecnolóxicas ao noso sector produtivo. Desta forma os empresarios poderán coñecer a través dunha breve introdución teórica, e dun caso de éxito como poderían mellorar na súa xestión, optimizar os seus procesos e por tanto ser máis eficientes e incrementar os seus resultados.
O ciclo constará de 8 seminarios de 4 horas de duración cada un, no que se realizará unha primeira parte de introdución á temática, ás utilidades da solución TIC presentada para as empresas, ás alternativas en Software Libre e aos criterios para seleccionar a mellor solución e provedor, para posteriormente desenvolver unha demostración práctica dun caso de éxito dunha das solucións libres expostas.
Programación dos seminarios
Os seminarios previstos para os meses de Outubro e Novembro son os seguinte
- Tenda en liña con software libre. Caso práctico: Traballar cunha Tenda en liña Libre. PrestaShop. 29 de Outubro
- Xestión de contidos con software libre. Caso práctico: Traballar cun Sistema de Xestión de Contidos (CMS) Libre. Joomla. 7 Novembro
- Xestión de clientes con software libre . Caso práctico: Traballar cun Sistema de Xestión de Clientes (CRM) Libre. SugarCRM. 12 de Novembro
- Xestión dunha rede empresarial con software libre .Caso práctico: Zentyal. 14 de Novembro
- Almacenamento na nube con Cloud computing con software libre . Caso práctico: OwnCloud. 19 de Novembro
- Xestión integral de empresa con software libre. Caso práctico: Traballar cun Sistema de Xestión Empresarial (ERP) Libre. OpenERP. 21 de Novembro
- Ferramentas de traballo en grupo con software libre Caso práctico: Traballar cunha Ferramenta de Traballo en Grupo Libre. E-GroupWare, 25 de Novembro
- Xestión documental con software libre Caso práctico: Traballar cun Sistema de Xestión Documental (DMS) Libre. Alfresco. 26 de Novembro
A asistencia é totalmente gratuíta estando só limitada pola capacidade da sala e previa inscrición en liña a través dos correspondentes formularios de inscrición de cada seminario na web do CDTIC.
Esta acción enmárcase dentro do Plan de acción en Software Libre do ano 2013, e desenvólvese en colaboración entre o Centro Demostrador TIC, a Oficina de Coordinación de Software Libre e AGASOL.
