Na páxina web maketecheasier.com podemos atopar un interesante artigo no que se da conta dun grupo de aplicativos enormemente útiles para todos os aficionados – e mesmo os profesionais – ao mundo da guitarra. Estes aplicativos cobren aspectos como a notación musical en formato de tablaturas, a edición de audio e a gravación multipista. Estes son os aplicativos que se mencionan no artigo:
Tablaturas e notación musical: TuxGuitar
O primeiro que moitos de nos imos precisar é un sitio onde escribir, gardar e reproducir tablaturas ou partituras. Moitos usuarios de Windows empregan PowerTab ou Guitar Pro. Para o mundo GNU/Linux existe o aplicativo TuxGuitar, moi similar a estes, e que ofrece case as mesmas características. O mellor de todo é que é compatíbel coas tablaturas de Guitar Pro, de xeito que se xa estamos afeitos a traballar con el, non teremos que perder ningunha das nosas cancións.
E, se non nos gusta TuxGuitar, podemos probar con KGuitar, KTabEdit, ou Gnometab.
Procesamento de efectos: FreqTweak
Existen múltiples programas para Linux enfocados ao procesamento de efectos en tempo real, e algúns hanche gustar máis ca outros. Escollemos FreqTweak para este exemplo porque é certamente simple de configurar e está dispoñíbel nos repositorios estándar de Ubuntu. Ademais, unha agradábel característica de FreqTweak é que se poden “debuxar” algúns efectos propios.
Se non nos agrada FreqTweak, podemos probar Creox, GNUitar, ou GTKgep.
Edición de son: Audacity
Durante anos, Audacity foi o editor de son máis destacado nos sistemas GNU/Linux. Inclúe un amplo conxunto de ferramentas e efectos, e úsao xente de todos os niveis de coñecementos. Con Audacity podemos gravar, reproducir, importar e exportar varios tipos de formatos de audio, e facer todos os retoques, todo no mesmo sitio. Aos guitarristas cunha guitarra acústica vailles gustar especialmente o plugin de cancelación de ruídos.
E se, por algunha razón, Audacity non é o que andamos buscando, sempre poderemos probar ReZound, Sweep, ou GNUSound.
Percusións: Hydrogen
Sempre hai un límite nas cousas que podemos facer con só unha guitarra, e un dos xeitos máis sinxelos de engadirlle algo de encanto ás nosas gravacións é engadindo algunha percusión. Existen varios aplicativos para crear pistas de percusións en Linux, pero Hydrogen é probabelmente o máis coñecido. Podemos dispoñer patróns de percusión individuais, e logo secuenciar eses patróns e crear unha canción máis longa. Hydrogen, xunto con algúns samples de percusións está dispoñíbel nos repositorios estándar de Ubuntu.
Outras opcións serían orDrumbox, BeatFish, ou pyTrommler.
A secuenciación: Ardour
Cando tratamos os temas da gravación multipista e a secuenciación en Linux, hai un aplicativo que nos vén á cabeza en seguida: Ardour. Pode que non sexa unha ferramenta que faga todo o traballo do que outras ferramentas profesionais son capaces, pero sen dúbida, combinándoo cos aplicativos que acabamos de mencionar, satisfará sobradamente as expectativas e necesidades de calquera aficionado á gravación doméstica.
Outros aplicativos destacábeis para a secuenciación multipista inclúen Jokosher, PROTUX ou Frinika.
De regalo: Afinación da guitarra
Igual que o programa privativo para Windows Guitar Pro, TuxGuitar tamén trae un afinador incorporado. É unha característica básica que calquera aficionado á guitarra ha agradecer.
Se non nos gusta o afinador que trae o TuxGuitar, podemos probar GuiTuner, JTuner, or GString.
