Do 31 de agosto ao 4 de setembro terá lugar a Ubuntu Developer Week, unha serie de obradoiros en liña, dunha semana de duración, nos que se poderá:
- aprender acerca de diferentes técnicas de empaquetado
- saber máis acerca dos diferentes equipos de desenvolvemento
- comprobar os esforzos da comunidade mundial de desenvolvemento
- participar en sesións abertas de preguntas e respostas con desenvolvedores de Ubuntu
- e moito máis
A comunicación durante esta Ubuntu Developer Week terá lugar maioritariamente en inglés, xa que ese é o idioma no que se realiza toda a comunicación no desenvolvemento de Ubuntu. Sen embargo, e para axudar a aqueles desenvolvedores que sintan que o seu inglés non é tan bo como para participar, varios membros de comunidades locais de Ubuntu estarán dispoñíbeis en diferentes canles de IRC para traducir as cuestións que se queiran consultar.
A axenda destes obradoiros pode consultarse en liña, no wiki de Ubuntu, ou ben podemos descargarnos un folleto en formato pdf onde, ademais dos horarios, presentacións e explicacións dos obradoiros, se nos presenta brevemente ás persoas que os van impartir.
Esta é a cuarta edición da Ubuntu Developer Week. As anteriores edicións tiveron lugar en xaneiro deste ano, setembro de 2008 e febreiro de 2008. Pódese consultar os programas destas edicións anteriores aquí.
Se algunha vez sentiches curiosidade sobre como funciona o desenvolvemento de Ubuntu, ou quixeches participar no desenvolvemento e non sabías como, non deixes pasar esta oportunidade de comunicación directa coa comunidade desenvolvedora.
