O goberno da illa lanza Nova, a súa propia distribución de Linux, coa que quere erradicar Windows dos seus computadores
Cuba acaba de anunciar o lanzamento da súa propia distribución do sistema operativo Linux. O programa, que se chama Nova, foi desvelado durante un congreso tecnolóxico que se está celebrando estes días na Habana e ten como obxectivo terminar coa hexemonía que Windows mantén na maioría dos computadores persoais da illa.
O goberno cubano ve o uso do sistema operativo estadounidense Microsoft como unha ameaza potencial xa que, na súa opinión, as axencias de seguridade do seu gran inimigo teñen acceso ao código fonte do programa, o que poría en perigo a seguridade informática do país.
Ademais, o embargo comercial que sofre Cuba por parte do goberno de Estados Unidos impide aos seus habitantes acceder a copias legais do software de Microsoft, así como ás actualizacións.
Na actualidade, segundo o decano da Facultade de Software Libre da Universidade das Ciencias Informáticas de Cuba, Héctor Rodríguez, ao redor do 20% dos computadores do país utilizan como sistema operativo algunha distribución de Linux.
Con todo, existe certa resistencia ao cambio en moitas das administracións públicas do país, que recelan de que Linux sexa 100% compatible cos seus propios aplicativos, segundo revelou o propio Rodríguez, quen indicou que en estamentos universitarios xa comezou a migración ao novo sistema operativo.
O decano espera que en cinco anos, a metade dos computadores da illa estean equipados con Nova. Rodríguez xustifica a necesidade da migración en que o software privativo (aquel no que o código fonte só o coñece a empresa propietaria) “pode conter buratos negros e código malicioso que o usuario descoñece, algo que non ocorre co software libre”.
Fonte: El País
