Os vindeiros días 7, 8 e 9 de Abril, celebrarase na Aula Universia da Biblioteca Intercentros no Campus de Lugo o curso "Introdución á Ubuntu-USC", impartido pola Oficina de Software Libre da USC dentro do Programa de Formación e Innovación Docente (PFID) da USC.
O obxectivo do curso é que os asistentes poidan realizar as súas tarefas diarias co sistema operativo GNU/Linux Ubuntu-USC de igual modo ao como as realizan co sistema operativo Windows. O curso versará sobre o proceso de instalación, configuración e manexo dos aplicativos básicos do día a día na distribución da universidade Ubuntu-USC, dende navegar por internet, escribir documentos co procesador de textos, comprimir un cartafol ata instalar e desinstalar programas.
A metodoloxía do curso será eminentemente práctica. O profesor amosaralle ao alumnado como moverse polo contorno da Ubuntu-USC, explicando as alternativas existentes para desenvolver as tarefas diarias, aprendéndolles o seu manexo así como a buscar novas alternativas pola súa conta. Sempre que se poida, realizaranse comparacións cos programas que manexan habitualmente para que poidan comprobar que non son tan diferentes e que, mesmo en ocasións, son moito máis sinxelos que os que xa coñecen. Ademais, explicaranse boas prácticas para sacarlle o máximo partido a informática.
Empregarase o software VirtualBox de Sun Microsystems, unha excelente e moi potente máquina virtual baseada en software libre.
O temario completo do curso pode verse ficha do curso dentro do PFID, sendo os temas principais:
- Instalación.
- Contorno de escritorio.
- Aplicativos de uso xeral: Firefox. Evolution. Rythmbox. Empathy. Totem / VLC.
- Instalación e eliminación de paquetes de software.
- Cando o software libre non é dabondo: Aplicativos privativos. Códecs. Controladores de dispositivo .
- “The GNU/Linux way”. A comunidade e a axuda entre usuarios.
- Breve introdución a outros aplicativos. Ofimática, vídeo, deseño e maquetación, xogos, VOIP e Videoconferencia.
Fonte: OSL da USC
