A Universidade de Vigo oferta varios cursos sobre aplicativos libres, un dirixido ao público en xeral e dous dirixidos ao persoal docente da Universidade.
O primeiro deles é o curso gratuíto denominado Gimp, creación e retoque mediante software libre, centrado no tratamento de imaxes a través do uso de ferramentas de código aberto, dirixido ao público en xeral e que se celebrará na Aula Tecnolóxica da Casa das Campás de Pontevedra entre o 1 e o 12 de febreiro, os luns, mércores e venres en horario de 19:00 a 21:00 horas.
Ofértase un total de 20 prazas que se cubrirán por orde de inscrición. A matrícula é gratuíta e poderá formalizarse ata o vindeiro venres día 29 de xaneiro a través da plataforma Bubela da Área de Posgrao Virtual. A información relativa a este curso pode consultarse na páxina web da Vicerreitoría do campus de Pontevedra. O curso, que será impartido pola profesora, Sonia Fernández Ferrón, vai dirixido tanto á comunidade universitaria como ás persoas externas a ela, que queiran ampliar os seus coñecementos na creación e tratamento de imaxes dixitais. Impartiranse nocións de como crear, manexar, editar e retocar imaxes empregando este software, que constitúe unha alternativa á coñecida aplicación comercial PhotoShop.
O segundo dos cursos ofertados é Openoffice e o seu uso na docencia universitaria (Campus de Vigo) dirixido a todos os profesores e profesoras da Universidade de Vigo con preferencia a aqueles que non realizaran ningunha das edicións do curso "Elaboración de materias docentes empregando ferramentas informáticas gratuítas". O obxectivo deste curso é familiarizarse coas distintas aplicacións que compoñen o paquete Openoffice, o equivalente en software libre ao Microsoft Office, con algunha aplicación máis, como o programa de debuxo.
O período de matrícula abrangue desde o 13 de xaneiro ata o 4 de marzo de 2010, e celebrarase entre o 8 e 15 de marzo e o 22 de marzo.
Finalmente, o último dos cursos ofertados neste momento, tamén dirixido ao persoal docente, é Introdución aos sistemas de información xeográfica con software libre (gvSIG): aplicacións para a análise da flora e da vexetación (Campus de Vigo). O curso, desenvolverase ao longo da primeira semana de febreiro na ETSE de Minas, e enfocarase de xeito práctico, sobre todo, cara a temas de análise da flora e da vexetación.
A idea xurde da iniciativa do Departamento de Bioloxía Vexetal e Ciencias do Solo, “ante a necesidade que temos os docentes e investigadores de pornos ao día na xestión de datos mediante sistemas de información xeográfica”, salientou o profesor Ramón Díaz, un dos coordinadores do curso. “Trátase de ferramentas moi versátiles e útiles que cada vez se están a empregar máis, pois facilitan moito tanto o almacenamento, como a xestión, análise e presentación final de bases de datos cunha compoñente xeográfica”, explica o docente.
O principal obxectivo deste curso, que está dividido en oito bloques temáticos, é que os docentes poidan empregar a información nas súas clases e aplicala empregando para elo software de fontes abertas, dispoñible para calquera usuario.
Fontes:
Código Cero
