Esta mensaxe é para anunciar a inminente finalización dunha nova versión de Linux, á que vou chamar Debian. Esta é unha versión que construín basicamente dende cero. Noutras palabras, non fixen simplemente algúns cambios a SLS e lle chamei “nova versión”. A inspiración para crear esta nova versión chegoume tras probar SLS e, en xeral, quedar insatisfeito con el, e despois de andar facéndolle cambios a SLS decidín que era mellor comezar de cero. O sistema base está xa virtualmente completo (aínda que sigo a buscar para asegurarme de que collín o código máis recente de todo), e gustaríame recibir algúns comentarios antes de engadir cousas máis “elaboradas”.
O 16 de agosto de 1993, chegaba ao grupo de novas comp.os.linux.development unha mensaxe que comezaba deste xeito de Ian Murdock; o fundador do proxecto Debian acababa de anuncialo a todo o mundo.
SLS (Softlanding Linux System) foi unha das primeiras distribucións de Linux, antepasada de Slackware, e unha das máis populares no seu momento
Na mesma mensaxe, podiamos ler o seguinte, toda unha declaración de principios acerca do que se buscaba con esta nova "versión de Linux".
Que fará que esta versión sexa mellor que SLS? Isto:
- Debian será máis elegante, e menos recargada. Non haberá múltiples binarios e páxinas de manual.
- Debian conterá a versión máis actual de todo. O sistema será fácil de manter actualizado cun script de ‘actualización’ que irá no sistema base e permitirá a integración completa de paquetes de actualización.
- Debian conterá un sistema de instalación que non necesite vixilancia. Simplemente hai que instalar o sistema base, copiar a distribución ao disco ríxido, responder unhas preguntas sobre que queremos e o que non queremos instalar e deixar que o sistema as instale mentres facemos cousas máis interesantes.
- Debian conterá un procedemento de configuración do sistema que tratará de instalar e configurar todo, dende a táboa de particións ata o sistema X.
- Debian conterá un sistema de menú que funcione. Instalación e actualización de paquetes a través de menús, configuración do sistema a través de menús, sistema de axuda e administración do sistema.
- Debian faralles Linux máis fácil aos usuarios que non teñan acceso á Internet. Os usuarios sen internet terán a opción de recibir paquetes de actualización periódicos para aplicárllelos aos seus sistemas.
- Debian estará amplamente documentado (máis que simplemente uns poucos “README”).
- Segundo vou xuntando as pezas de Debian, levo un rexistro meticuloso de onde collín cada cousa. Isto permitiralle ao usuario final non só saber de onde coller o código, senón tamén saber se a última versión é parte de Debian. Este rexistro axudará a manter Debian actualizada.
- Moito máis, pero xa o irei contando…
Recentemente cumpríanse 16 anos dende que esta mensaxe foi enviada ao grupo. A día de hoxe, Debian converteuse nun proxecto consolidado, robusto e amplamente empregado. Ademais, Debian é a base da que saíron moitas outras distribucións, como Knoppix (a máis famosa distribución en formato cd-vivo), Damn Small Linux (unha distro de escritorio de só 50 mb), ou a coñecida Ubuntu.
