O martes 11 de agosto vai ter lugar no Moscone Center, de San Francisco, California, unha actividade que os seus organizadores deron en chamar o Día da Interoperabilidade Linux – Microsoft.
Na páxina do proxecto Samba, podemos atopar unha páxina wiki presentando esta actividade, nun ton simpático e informal. Esta presentación vén dicir o seguinte:
Nesta actividade os participantes tentarán abrirse camiño entre as sombras do FUD (Fear, uncertainty and doubt – medo, desconfianza e dúbida – , unha táctica de propaganda consistente na difusión de información maliciosa sobre o adversario) e aprender a facer que Microsoft Windows e o código aberto se entendan, dende a simple compartición de ficheiros ata contornos de inicio de sesión único baseados en estándares.
Os temas a tratar neste Día da Interoperabilidade inclúen:
- Estratexias para servidores de directorio para contornos mixtos fiábeis sen saírse de presuposto.
- Axustes de seguridade, configuración e rendemento en Samba para clientes con Windows Vista e Windows 7.
- Reláxense, funciona de serie: ferramentas útiles xa presentes en calquera sistema Linux actualizado.
- Q&A no mundo real: Presente o seu problema de interoperabilidade máis difícil.
Na mesma páxina wiki pódese atopar un borrador da programación. Como eles mesmos din “Esta actividade é unha desconferencia, así que definiremos a programación final o día mesmo da actividade”.
Fonte: Unha mensaxe dun dos organizadores no servizo de microblogging identi.ca comentando que están a buscar charlas breves e consellos para ese día.
