Os vindeiros días 24 e 25 de abril , de 16:00 a 20:00 horas celebraranse na aula de graos da Facultade de Informática de A Coruña as XII Xornadas Libres organizadas por GPUL.
A asistencia a estas xornadas está aberta a calquera persoa con interese en achegarse ao software libre, hardware libre ou cultura libre en xeral.
A asistencia é de balde e todos aqueles interesados deberán inscribirse previamente a través do formulario habilitado aos efectos.
O programa das xornadas é o seguinte:
Mércores 24 de abril
- 16:00 – Como colaborar cun proxecto de SL , José Millán Soto (GPUL) . Nesta charla comentarase como colaborar cun proxecto de Software Libre, poñendo como exemplo principal a KDE.
- 17:00 – Pon unha licencia ó teu Software… sobre todo se é Libre, Chema Casanova (GPUL). Falarase sobre a importancia de poñer unha licenza ao Software, tipos de licencias libres, limitacións e compatibilidades, xestión da propiedade intelectual e control de dependencias e contidos complementarios.
- 18:00 – Google Summer of Code: charla divulgativa, Valentín Barros (FIC) , Santiago Munín (FIC). Dous participantes de edicións previas do GSoC e alumnos da FIC falarán da súa experiencia e darán unha serie de consellos para aqueles que queiran intentalo este ano.
Xoves 25 de abril
- 16:00 – Python: adestrando serpes, Marcos Chavarría Teijeiro (GPUL) e Santiago Saavedra López (GPUL) . Charla demostrativa sobre Python. Exploraranse desde as características máis básicas a aquelas que fan de Python unha linguaxe que permite centrarse no que é e non no como.
- 17:00 – Introdución ao control de versións con git , Emilio Padrón (GPUL). Se es dos que non empregan Sistemas de Control de Versións no seu "workflow" (…are you from the past?), ou aínda empregas sistemas "clásicos" coma subversion, esta é a túa charla.
- 18:00 – Deseñando Hardware Libre con KiCad , Jacobo Aragunde (Igalia) e Samuel Iglesias Gonsálvez (Igalia) . KiCad é a principal ferramenta libre para deseño de circuítos electrónicos. Darase un repaso ás súas principais características e verase o ciclo completo de deseño dun proxecto de hardware.
- 19:00 – Primeiros pasos con Arduino, Mauro Silvosa-Rivera (GPUL) . Neste obradoiro ensinarase aos asistentes o rápido e sinxelo que é poñerse mans á obra con Arduino, chegando a probar cousas razoablemente interesantes.
