Algunhas destas ferramentas son as seguintes:
-
Alice ensina fundamentos de programación a xeito de películas e xogos en 3-D. Alice está desenvolvido en Java e usa interface de “arrastrar e soltar” (drag and drop). Está feito por un equipo da universidade de Carnegie Mellon University, ten versións para GNU/Linux, Mac O$ X e Window$ baixo a licenza Alice License. A contorna é de código aberto, podes examinar o código pero os seus creadores prefiren facer sós o seu desenvolvemento polo que rexeitan as contribucións foráneas.
-
Baseado na linguaxe de programación Ruby, Shoes é un conxunto de ferramentas de código aberto baixo licenza MIT e acepta contribucións pero xa está máis na liña da programación tradicional con sintaxe semellante á de Ruby. O único que require a máís é un editor de texto. Na súa web atoparás unha guía en PDF con titorial e exemplos alén do manual en liña da contorna. Shoes ten unha sección para siareiros que amosa aplicacións creadas con esta ferramenta.
-
Kturtle, unha aplicación que forma parte do paquete de aplicacións de kdeedu. Con el, prográmase unha tartaruga para que pinte nun panel segundo o programa en linguaxe logo que lle pasemos. Con isto, os/as nenos/as poden aprender, non só a programar, senón tamén matemáticas e xeometría.
-
xlogo. Parecido ao anterior, está en Java, o que o fai multiplataforma. Hai que salientar que Logo debe ser das poucas linguaxes de programación que se traducen a diferentes línguas. Isto o fai moi adecuado para a aprendizaxe dos/as rapaces/as. Entre outros, pode ser traducido ao galego.
Outra alternativa de código aberto é Scratch pero só ten versión para sistemas privativos a pesares de ser de código aberto, e a súa execución baixo Wine non acada resultados satisfactorios. Existen outras moitas linguaxes/contornas de programación pensadas para a infancia tales como Greenfoot ou Phogram, pero son privativas.
