Facebook anunciou o pasado 10 de setembro a publicación baixo a licenza Apache versión 2 do framework e servidor web que fornece as capacidades de tempo real a FriendFeed.com, recentemente adquirida por Facebook.
Esta publicación encádrase na iniciativa a prol do código aberto de Facebook a través da que queren por á disposición da comunidade proxectos de interese con licenzas libres que consideran contribuirán a incrementar a innovación no desenvolvemento web.
Segundo se pode ler no anuncio, Tornado é un framework e servidor web escrito en Python, deseñado e optimizado para manexar milleiros de conexións web simultáneas, facéndoo ideal para servizos web en tempo real. Tornado forma parte do núcleo da infraestrutura web de FriendFeed que o equipo de Facebook pretende manter activamente. Aínda que é semellante a outros frameworks existentes (Django, Google’s webapp, web.py), a súa principal vantaxe é a velocidade e a capacidade de manexar eficazmente grandes cantidades de tráfico simultáneo.
O director de produtos de Facebook, Bret Taylor, explica no seu blog con maior profundidade os detalles técnicos de Tornado e a historia de por qué acabaron escribindo un servidor web propio no canto de empregar algún dos existentes. Nas súas palabras: “Acabamos escribindo o noso propio servidor web e framework logo de probar outros servidores e ferramentas como Twisted e comprobar que ningunha cumpría con todos os nosos requirimentos de facilidade de uso e de rendemento.”
