Continuando co 3º ciclo dos sábados libres na Altamar, GALPon organiza para o vindeiro sábado 28 de febreiro o primeiro editatón da Galipedia en Vigo, que será coordinado e dirixido polos administradores da Galipedia.
Un editatón é unha reunión onde os participantes se xuntan para editar a Galipedia, tanto de forma presencial coma virtual. Cada editatón adoita dedicarse a un tema concreto; nesta ocasión centrarase na creación e mellora de artigos relacionados coas tecnoloxías e a cultura libres, aínda que sen deixar fóra outras posibilidades.
Chamamento especial á comunidade docente
Dende GALPon fan un chamamento especial á comunidade docente para participar nesta xornada, co obxectivo de aprender xuntos como participar na creación e mellora de artigos da Galipedia.
Seguramente moitos docentes teñen usado artigos da Wikipedia nas súas clases, igual que os seus alumnos e alumnas, mais case con toda probabilidade aínda non se animaron a participar activamente nela e colaborar na edición de artigos. Probablemente a maioría por descoñecemento e falta de tempo para aprender como facelo.
GALPon anima aos docentes a participar nesta xornada para aprender, guiados e asesorados por usuarios experimentados, a contribuír a que medre o coñecemento dispoñible para todo o mundo, na nosa lingua.
O obradoiro ten ademais a intención de explorar as posibilidades de incorporar a documentación da Galipedia nas nosas aulas, polo que intercambiaranse ideas e experiencias que poidan darlle ao alumnado a oportunidade de ser non só usuarios, senón participantes activos e creadores do patrimonio cultural e libre da humanidade.
Programa da xornada
O programa provisional da xornada ten por obxectivos iniciais contribuír á mellora de artigos existentes na Galipedia así como a creación doutros novos relacionados coas tecnoloxías libres. Por suposto este programa é susceptible de modificación e ampliación segundo os intereses dos participantes que se vaian inscribindo no mesmo. Pódese consultar a información máis recente tanto no wiki de GALPon como na páxina do editatón da Galipedia .
É recomendable que todos os asistentes leven xa creado un usuario de seu na Galipedia. Para iso non teñen máis que:
- Acceder á páxina principal e, na parte superior dereita, premer en Crear unha conta
- Cubrir os campos solicitados, e tras premer en “Crear a conta” recibirán un mail cunha ligazón para confirmar o rexistro.
Propostas de artigos a mellorar
- Software libre
- Open Street Map
- Arduino
- Inkscape
- GIMP
- Creative Commons
- Copyleft
- Chamilo
- MySQL
- Proxecto GNU
- GNU (sistema operativo)
Propostas de creación de artigos
- Software privativo
- Copiade, malditos!
- MOOC
- Cultura libre
- Datos abertos
- Licenzas Creative Commons
- Hardware libre
- Arquitectura aberta
- Bitcoin
- Educación aberta
- Impresora 3D
Para asistir á xornada do vindeiro 28 de febreiro, é necesario inscribirse e reservar praza como sempre a través do correspondente formulario de inscrición.
Confiando na boa acollida desta xornada dende GALPon están na procura dun novo espazo que admita máis xente que o espazo habitual da residencia Altamar, que conte coas óptimas condicións técnicas e de comodidade e sen afastarse demasiado xeograficamente do espazo habitual.
Como sempre tamén, podedes seguir o desenvolvemento desta actividade no «evento no G+»
