GALPon comeza o novo ano presentando o 2º ciclo de Sábados Libres na Altamar, despois do éxito acadado con esta iniciativa o pasado ano.
Este ciclo desenvolverase o último sábado dos meses de xaneiro – xuño e setembro-novembro.
O ciclo para este 2014 inaugúrase o próximo sábado 25 de xaneiro co primeiro obradoiro práctico Introdución ao Sistema de Control de Versións GIT (I) que vai ser dirixido por Jesus Amieiro Becerra.
Como nos anteriores casos, a participación e asistencia a este obradoiro é de carácter gratuíto, e está aberta ao público en xeral, mais por motivos de aforo e pola complexidade do curso estableceuse un límite de 24 prazas, polo que é obrigatorio formalizar a inscrición a través do formulario de inscricións.
A todos os interesados recomendámosvos que vos inscribades canto antes, xa que segundo informan na páxina do «evento» no G+ nas primeiras 24 horas cubríronse máis da metade das prazas.
Recoméndase levar xa instalado no voso computador o paquete GIT e desaconséllase o uso de interfaces de usuario (IGU/GUI) durante a xornada.
Este obradoiro terá unha segunda parte o sábado 29 de marzo tamén dirixido por Jesús Amieiro Becerra no que se afondará no uso de GIT.
Programación do 2º ciclo de obradoiros
As datas e obradoiros do primeiro semestre están confirmadas, pero están aínda pendentes de pechar as dos obradoiros de despois do verán.
Obradoiros do 1º semestre
- 25 de xaneiro. Sistema de Control de Versións GIT: Introdución. Obradoiro dirixido por Jesús Amieiro Becerra.
- 22 de febreiro. Estatística con R: Introdución. Obradoiro dirixido por Miguel Branco, investigador no Depto. de Ecoloxía e Bioloxía animal, UVigo
- 29 de marzo. Sistema de Control de Versións GIT: Afondamento. Obradoiro dirixido por Jesús Amieiro Becerra.
- 26 de abril. Estatística con R: Afondamento. Obradoiro dirixido por Miguel Anxo Rodríguez Muíños, técnico informático na Dirección Xeral de Innovación e Xestión da Saúde Pública. Consellería de Sanidade. Xunta de Galicia
- 31 de maio. Programación orientada a obxectos con Python e Vala. Introdución ao concepto de «obxecto» e primeiros desenvolvementos. Obradoiro dirixido por Sergio Costas (aka rastersoft), desenvolvedor de diversos proxectos de SW
- 28 de xuño. Programación orientada a obxectos con Python e Vala. Afondamento no desenvolvemento, uso de «Frameworks» para Python e Vala. Dirixido por Sergio Costas (aka rastersoft), desenvolvedor de diversos proxectos de SW
Obradoiros provisionais do 2º semestre (despois do verán)
- Presentación do proxecto de automática/robótica con Hw Libre patrocinado por GALPon
- Hw Libre (RaspberryPi / Arduino / Cubieboard) Orientado ao desenvolvemento de solucións Hardware, non a software. Obradoiro dirixido por Guillermo Cordeiro. desenvolvedor e técnico de sistemas en Tegnix.
- Bash scripting III. Obradoiro dirixido por Guillermo Cordeiro, desenvolvedor e técnico de sistemas en Tegnix e por Miguel Anxo Bouzada, desenvolvedor e coordinador das distros GALPon MiniNo e MiniNo PicarOS.
- OSGeo ─ Open Maps . Coa colaboración do grupo xeoinquedos .
Podedes consultar máis detalle no wiki de actividades de GALPon.
