Unha iniciativa da comunidade de software libre do Reino Unido crea unha versión do tema oficial Gov.UK para Bootsrap. Govstrap.io é unha iniciativa levada a cabo por OpusVL, unha empresa do Reino Unido especializada en software libre. Esta iniciativa consiste en portar a Bootstrap, o coñecido framework de deseño web liberado por Twitter, o tema oficial para sitios web do goberno do Reino Unido, Gov.UK.
Gov.UK é unha iniciativa levada a cabo polo goberno do Reino Unido para a creación dun tema oficial para os seus sitios web altamente accesible, no que se inverteron dous anos de investigación para deseñar unha interface que permita o acceso aos servizos ao maior número de cidadáns posibles. Todo este traballo foi liberado polo goberno cunha licenza de software libre, xa que en propias palabras dos seus responsables: "A maioría do que estamos a facer é posible só grazas ao software libre e a xenerosidade da comunidade de deseño web. Tiñamos que devolverllo dalgunha forma."
Con estes mesmos principios naceu Govstrap.io, grazas a que Gov.UK é software libre, foi posible refacelo empregando Bootstrap e liberalo tamén como software libre, dispoñible para toda a comunidade, o que permitirá aos desenvolvedores web que traballen no eido do sector público aforrar custes, pudendo desenvolver sitios que se aproveiten de toda a funcionalidade e accesibilidade que hai detrás deste desenvolvemento. Pero non so iso, xa que toda esa investigación en usabilidade é aproveitable tamén polo sector privado para a creación de proxectos dixitais.
