Dende GPUL informan da organización dun novo ciclo de xornadas de difusión de Software Libre e cultura libre ao que deron en chamar os Xoves Libres, aínda que paradoxicamente inciarase o vindeiro mércores 19 de marzo co relatorio “Navegando entre Webkit e Chromium/Blink.
Segundo a información proporcionada, trátase dun evento periódico que terá lugar ao longo de varias semanas, alternando mércores e xoves. Realizaranse tanto relatorios como obradoiros prácticos relacionados con diversos ámbitos, contando coa colaboración de diferentes empresas, así como proxectos singulares.
O primeiro relatorio deste ciclo chega da man de Xabier Rodríguez Calvar (calvaris), socio e enxeñeiro da empresa Igalia, quen achegará aos asistentes ao mundo dos motores web libres na ponencia “Navegando entre Webkit e Chromium/Blink”.
Así o vindeiro día 19 de marzo a partir das 19:30 horas Xabier falará da súa experiencia en tecnoloxías libres de motores web, como son WebKit, motor web empregado por Apple nos seus produtos (safari …) e noutros navegadores do escritorio GNOME, entre outros, e de Chromium/Blink, fork de WebKit creado por Google para empregar nos seus produtos. Os temas a tratar serán a historia, estrutura da tecnoloxía, comunidades, fluxos de traballo, etc.
