A asociación GPUL organiza para este mércores día 12 de xuño un hacklab de iniciación ao desenvolvemento en Qt e KDE.
O obradoiro celebrarase no laboratorio 0.4w da Facultade de Informática da UDC a partir das 17:30 cunha duración aproximada de dúas horas.
O hacklab consiste nun encontro informal similar a un grupo de traballo para aprender e traballar todos xuntso sobre unha mesma tecnoloxía. Nesta ocasión o evento xirará en torno á programación de aplicativos para o contorno de escritorio KDE, onde se explicarán as bases técnicas do desenvolvemento en C++ e en python de aplicativos con Qt e kdelibs.
A xornada desenvolverase de forma totalmente práctica, polo que recomendan que os asistentes leven os seus portátiles, e dende a organización informan que en todo momento tentarase adaptar a formación ao nivel de coñecementos previos dos asistentes, sendo o único requisito para poder tirar proveito da xornada ter programado nalgunha ocasión con linguaxes orientadas a obxectos.
Esta actividade forma parte das actividades que GPUL realiza ao abeiro do convenio de colaboración asinado coa Axencia para a Modernización Tecnolóxica de Galicia (AMTEGA), e incluídas no Plan de Acción de Software Libre 2013 da Xunta de Galicia.
