Recentemente, foi inaugurado PostgreSQL-es.org, un portal internacional sobre PostgreSQL en castelán. Este portal pretende ser un punto de encontro e intercambio de coñecementos e experiencias sobre PostgreSQL, para os usuarios castelanfalantes deste motor de bases de datos relacional, con licenza de software libre(BSD).
PostgreSQL é un sistema de xestión de bases de datos obxecto-relacional, distribuído baixo licenza BSD e co seu código fonte dispoñíbel libremente. É un dos sistemas de xestión de bases de datos máis potentes do mercado e nas súas últimas versións no ten nada que envexarlle a outras bases de datos comerciais.
PostgreSQL emprega un modelo cliente/servidor e emprega multiprocesos en lugar de multifíos para garantir a estabilidade do sistema. Un erro nun dos procesos non afectará ao resto e o sistema continuará funcionado.
