A directora xeral de Promoción Industrial e da Sociedade da Información, Helena Veiguela, presentou onte na Coruña a nova plataforma Emprendizaxe desenvolvida pola Consellaría de Innovación e Industria dentro do Plano Estratéxico Galego da Sociedade da Información .
Está baseada na tecnoloxía Kubbe, da empresa Netex (Oleiros-A Coruña) e, segundo eles mesmos definen, é unha ferramenta de aprendizaxe social e compartido centrada no alumno. Este é quen escolle o que desexa aprender, crea os seus propios medios para participar no proceso de aprendizaxe (blogs, comentarios…) e escolle tamén a cales das redes de aprendizaxe existentes quere unirse. A implantación desta aplicación realizouse no servidor “Alicerce” instalado no CESGA, facendo uso exclusivamente de tecnoloxías libres: Debian, Apache+Tomcat, MySql, J2EE+Ajax e red5 como servidor de streaming para os contidos multimedia dos cursos.
Emprendizaxe é pois unha peza máis dunha estratexia encamiñada a combinar servizos web informativos, formativos, así como ferramentas desenvolvidas a medida para responder ás necesidades específicas da PEME sempre dentro da liña estratéxica de apoio decidido ao software libre na promoción da industria e da sociedade da información que esta Dirección Xeral mantén tanto nos desenvolvementos a medida (Exeria, Orzamental…) como nas ordes de axudas TIC (empresas, asociacións …)
Fonte: Dirección Xeral de Promoción Industrial e Sociedade da Información
