Knowledge Tree Community Edition 3.6, xestión documental en software libre

Knowledge Tree é un dos sistemas de xestión documental (DMS) en software libre máis importantes do mercado. Con Knowledge Tree obterás unha contorna de traballo estruturada, segura e óptima para a xestión da información de acordo cos fluxos de traballo e os procesos críticos da empresa. Knowledge Tree xestiona un almacén ou repositorio central de documentos, onde se poden publicar contidos, documentos, e case calquera tipo de ficheiros, todo integrado cun sistema de control de versións que nos permite ver as diferenzas entre as distintas versións dos documentos. Tamén inclúe múltiples tipos de buscas, metadatos, un panel de xestión configurábel, métricas relativas á xestión dos contidos, etc…

Outras características son que é unha aplicación cliente/servidor baseada en tecnoloxías LAMP e cun buscador en Java (http://lucene.apache.org). Permite a conexión concorrente de varios usuarios deste distintos lugares, tanto internos á propia empresa, como externos, podendo configurar os lugares remotos desde os que os usuarios se poden conectar.
A aplicación conta con licenza dual: unha libre e outra de pago, coa diferencia de que a última engade unhas cantas funcionalidades máis, como a integración con Outlook e Office de Microsoft e soporte telefónico. No entanto, na comunidade de desenvolvedores da versión libre están estudando a posibilidade da súa integración con OpenOffice.org

Hai dispoñible unha “demo” da versión comercial en liña na seguinte URL:
http://www.knowledgetree.com/live_demo

A lista completa de cambios desta nova versión pódese atopar na seguinte ligazón:
http://wiki.knowledgetree.com/Version_3.6-Community_Edition