Os entusiastas dos xogos de estratexia en tempo real están de en hora boa, xa que a empresa Wildfire Games acaba de anunciar que libera o código do seu xogo 0 A.D, nun intento de contar con desenvolvedores independentes para que axuden a rematalo e estendelo máis alá dos plans orixinais do proxecto.
0 A.D é un xogo similar ao famoso Age of Empires ou ao Imperium pero a diferenza con estes é que o seu código está agora liberado baixo licenza GPL v2.0 e todos os seus contidos artísticos baixo a CC-BY-SA. Entre as características deste xogo podemos destacar as seguintes:
-
Fidelidade histórica
-
Seis civilizacións diferentes
-
Estacións do ano e cambios meteorolóxicos
-
Provincias e territorios
-
Mapas realistas
-
Guerras navais moi reais
-
Editor moi completo
-
Varios modos multixogador
Este xogo baseado na historia leva en desenvolvemento dende o ano 2001, e ten xa 150.000 liñas de código C++. Polo momento, o proxecto está en estado Alpha, e os instaladores aínda non están dispoñíbeis, pero pódense atopar as instrucións para compilalo en GNU/Linux, Mac OS e Windows.
Wildfire Games tamén acaba de sacar un concurso público para obter sons para as batallas, como, por exemplo, os son dos de guerreiros chorando ou berrando nas batallas. Así que a persoa que estea interesada en que a súa voz saía neste xogo pode chegar a conseguilo.
Preme aquí para ver un vídeo demostrativo deste xogo.
