Vimos de realizar melloras no Corpus de Mancomún como resposta á demanda dalgúns membros da comunidade.
A maior novidade é a creación dun par de motores de busca (baseados nas especificacións de OpenSearch) para incorporalos na barra de buscas web do Firefox e outros navegadores compatibles con OpenSearch, como Internet Explorer.
Grazas a estes motores é posible axilizar as buscas no Corpus.
Existen dous motores, un para a dirección de en->gl e outro para gl->en que realizan a busca do termo inserido en todos os proxectos. Para instalalos só hai que acceder á páxina inicial do Corpus e ao premer na ligazón correspondente, apareceranos un diálogo de confirmación para a instalación do motor. Aceptamos a instalación e xa teremos instalado o motor de buscas.
Outras características do Corpus:
- Posibilidade de busca en todos os proxectos
- API de consulta (vía XML e XML-RPC) para o desenvolvemento de aplicacións, que permite programar aplicacións que fagan buscas no Corpus.
- Desenvolvementos baseados no Corpus de Mancomún:
Desenvolvementos na Forxa usando
a API do Corpus.Plugin para gedit
O Corpus de Mancomún é un corpus de sublinguaxe LSP (Languages for Special Purposes) co fin de formalizar un repertorio terminolóxico na localización de software libre ao galego. O corpus está composto polos ficheiros PO que inclúen a tradución ao galego de determinados proxectos e que permite procurar palabras en inglés (ou en galego), e que devolve parellas de frases inglés-galego (ou galego-inglés) nas que se atopa o texto procurado correspondente.
Trátase dunha ferramenta moi útil para coñecer como se ten traducido unha determinada palabra noutros proxectos e manter así unha coherencia terminolóxica.
