Unha resolución dun tribunal de apelacións acaba de revogar unha decisión tomada en 2007 polo xuíz Dale Kimball que afirmaba que Novell era o propietario dos dereitos de Unix e UnixWare. Este feito deixa a SCO o camiño aberto para proseguir cunha demanda de 1.000 millóns de dólares contra IBM por incumprimento de patentes.
Este é só o último capítulo dunha longa historia de demandas e visitas aos tribunais, da que xa temos dado conta nesta páxina.
A historia comeza en 1993 cando Novell pagou máis de 300 millóns de dólares pola compra de Unix System Laboratories, propietario dos dereitos e licenzas de Unix. Dous anos máis tarde Novell decidiu vender o negocio Unix a SCO. As dúas compañías mantiveron diferentes posturas respecto de se a venda incluía a propiedade dos dereitos de código, pero o caso é que en 2004 Novell afirmou posuír os dereitos de Unix despois de que SCO decidise presentar unha demanda un ano antes para facer cumprir o copyright de Unix.
En 2003 SCO afirmou que Linux era unha derivación ilegal do código de Unix, que a compañía comprara a Novell, e iniciou a súa particular cruzada escollendo a IBM como o seu primeiro obxectivo nunha demanda de 1.000 millóns de dólares afirmando que a compañía violara os dereitos de SCO contribuíndo con código proveniente de Unix a Linux.
Microsoft uniuse ao combate acordando licenciar código Unix a SCO e utilizando esta asociación para alimentar a confusión sobre as licenzas de código aberto e a responsabilidade que puidesen ter os usuarios corporativos. E é que SCO adicouse a enviar cartas a grandes compañías advertíndolles de que se empregaban Linux poderían violar a propiedade intelectual de SCO, que foi cando Novell reclamou a propiedade de Unix.
En agosto de 2007 o xuíz Dale Kimball déralle finalmente a razón a Novell, facéndoa propietaria dos dereitos de autor de Unix e UnixWare e impoñendo a SCO unha multa de 2.500 millóns de dólares. Pouco despois SCO anunciou a súa quebra. Aínda que dende a comunidade do software libre se percibira a decisión do xuíz como a fin dos litixios e do caso SCO, a realidade parece ser outra.
Fonte: www.itespresso.es
