Logo de moitos anos, finalmente vislúmbrase a luz ao final do túnel. Firefox vén de anunciar que incluirá en breve á FNMT (Fábrica Nacional de Moeda e Timbre de España) na súa base de entidades certificadores recoñecidas. É dicir que o navegador Firefox recoñecerá automaticamente que os sitios web das sedes electrónicas da administración pública española son sitios seguros e confiables sen necesidade de realizar complexos pasos previos de instalación manual de certificados.
Deixaremos de ver por fin o aviso inicial de "sitio non seguro" ao acceder por primeira vez á calquera sede electrónica española se non temos engadido o certificado raíz da FNMT ou se non temos engadida unha excepción.
Deste modo, Mozilla Firefox converterase no primeiro navegador web libre con soporte para a autoridade certificadora dixital da FNMT dándolle vantaxe de uso nos portais web da administración.
Sen dúbida unha excelente nova para o software libre e para o avance da administración electrónica en España.
A inclusión do certificado raíz da FNMT na base de datos de certificados de Mozilla Firefox permitirá o acceso completo e plenamente fiable a os servizos web securizados baixo certificados dixitais expedidos pola FNMT sen necesidade de facer a instalación manual do certificado raíz da mesma.
O problema histórico da inclusión do certificado raíz da FNMT no navegador Firefox vén de lonxe pero tamén a solicitude de solución que data do ano 2008. Onte, finalmente, fíxose o anuncio da intención de aprobar a inclusión do certificado da autoridade certificadora da FNMT e habilitar a confiabilidade dos dominios web que usen certificados firmados por esta autoridade.
Podemos considerar esta nova como un gran fito para a administración pública electrónica española xa que simplifica o uso dos portais de servizos web por internet da administración estatal debido a que a meirande parte deles están a usar certificados expedidos pola propia FNMT.
Durante todos estes anos pasados, para paliar esta situación, a FNMT documentaba un proceso manual no que se describía paso a paso como poder incluír o certificado raíz da mesma nos diversos navegadores web soportados. Sen ben é certo que isto permitía o uso seguro do certificado, a súa instalación tiña as súas contrapartidas, dende a complexidade da operación que non está ao alcance de calquera usuario, como que debía de ser unha operación feita manualmente para cada ordenador o que reducía enormemente a interoperabilidade e o uso seguro en calquera dispositivo, reducindo así as prestacións reais da administración electrónica.
