O Concello de Santiago de Compostela apostará polo software libre na súa nova estratexia de cara á mellora do acceso electrónico aos servizos públicos ofertados polo consistorio aos cidadáns. Así o puxo onte de manifesto a concelleira de Reforma Administrativa, Rosa Fernández Somoza, durante a presentación dos plans que rexeran todo o proceso.
Este proxecto concretarase a través de dous plans directores, que darán como resultado unha maior accesibilidade e navegabilidade do portal web, a renovación da intranet municipal, a integración das aplicacións informáticas do Concello e unha serie de servizos específicos.
Este Plan Director para a Lei de acceso electrónico terá unha primeira fase de análise e diagnóstico, que se desenvolverá no primeiro trimestre do 2009 e cun custo de 12.000 euros. Nesta etapa farase un inventario e un estudo de viabilidade de adaptación dos aplicativos informáticos de xestión, das bases de datos, dos sistemas informáticos e de telecomunicacións, do portal municipal e da intranet.
A continuación, nunha segunda fase, deseñarase un sistema informático e un plan de acción. Estableceranse así as liñas estratéxicas do Concello no tocante á administración electrónica. Este sistema permitirá, entre outras posibilidades, montar un sistema de información municipal integrado e capaz de crear novos servizos cara os cidadáns.
Estes dous plan directores complementaranse, dando lugar finalmente a unha serie de proxectos. Así, procederase á renovación do portal municipal, dotándoo dunha maior accesibilidade e navegabilidade e de máis servizos de administración electrónica. Entre estes servizos que se van implantar poden citarse algúns como o rexistro telemático, os taboleiros de anuncios dixitais, a notificación telemática, a expedición de documentos electrónicos, a facturación electrónica, a contratación electrónica ou o selado electrónico.
O traballo nestes dous plans permitirá que o Concello estea preparado para asumir de inmediato calquera avance tecnolóxico que se produza nestas materias. A nivel interno, tamén posibilitará unha renovación da intranet municipal e a integración de todos os aplicativos informáticos do Concello.
