A Asociación GPUL vén de unirse aos patrocinadores da VI edición do Premio ao Mellor Proxecto Fin de Carreira con Licenza Libre cunha achega de 750€ que se unen aos 1.500€ que achega o CIXUG. Desta forma o gañador desta edición do premio recibirá 1.500€ e o proxecto recoñecido co accésit recibiría 750€.
Ambos patrocinios forman parte das actividades que o CIXUG e a asociación GPUL realizan con cargo aos respectivos convenios de colaboración asinados coa AMTEGA para a promoción e difusión do Software Libre en Galicia, no marco do Plan de Acción en materia de Software Libre da Xunta de Galicia.
Dende a asociación GPUL queren contribuír deste xeito a aumentar o atractivo do premio para os posibles participantes, co obxectivo de que o número e a calidade dos proxectos presentados sexa maior.
Agardamos que os estudantes que estean en proceso de desenvolvemento do seu Proxecto de Fin de Carreira ou Fin de Grao, vexan que a elaboración do mesmo seguindo a forma de traballo das comunidades de software libre e seleccionando unha licenza libre para o seu proxecto pode permitirlles participar neste premio e recibir unha boa compensación económica polo seu traballo. Ademais serviralles tamén para que todos os participantes reciban o recoñecemento público do seu bo traballo, o que indirectamente pode permitirlles acceder a postos de traballo mellor valorados nun mercado laboral cada vez máis competitivo, onde a meritocracia e o recoñecemento son unha boa diferenciación co resto de competidores laborais.
Como indicabamos a semana pasada na convocatoria da VI edición do premio os requisitos que deben cumprir os proxectos son ter sido realizados cunha implementación libre de calquera linguaxe de programación e ter publicado o software desenvolvido durante o Proxecto Fin de Carreira cunha licenza libre entre as recoñecidas como tal pola Free Software Foundation ou a Open Source Initiative. Por suposto, neste marco encadraríanse tamén aqueles proxectos que fagan uso de Hardware Libre.
Pode optar ao premio calquera estudante do Sistema Universitario Galego que teña defendido o seu Proxecto de Fin de Carreira, cunha nota mínima de 5.0, nalgunha das convocatorias do ano académico 2012-2013. O prazo de presentación de candidaturas comeza hoxe e remata o 31 de outubro.
Se algunha asociación, empresa, entidade, … ten interese en patrocinar algunha categoría especial dentro deste premio pode poñerse en contacto organización do premio tanto a través da Oficina de Coordinación de Software Libre da Xunta de Galicia como da OSL do CIXUG.
Así mesmo todos os interesados en participar poden consultar a información na páxina do premio dentro do portal mancomún ou poñerse en contacto coa organización do premio.
