O Instituto Tecnológico de Galicia (ITG) anunciou na súa web que durante este mes está levando a cabo diferentes actividades de implantación do seu software aberto de ERP: Hgpyme.
Así, na entidade BIC Galicia (Centro Europeo de Empresas e Innovación de Galicia), están a piques de rematar a implantación despois de 6 meses de traballo. A estrutura modular do software, o código aberto e a súa accesibilidade a través da Internet desde calquera dispositivo móvil foron algúns dos factores máis determinantes á hora de elexir a solución ERP HGPyme para o proxecto, segundo comentan na propia web.
As outras dúas empresas nas que se está implantando son:
- Electrónica del Noroeste onde o traballo realizado polo ITG está nunha primeira fase centrada na personalización do módulo de xestión de proxectos e a interactividade web con clientes e provedores.
- Construcciones Vixoy, empresa construtora especializada en edificación, obra civil e urbanismo que elixiu HGPyme para controlar de forma rápida e eficiente os custos de todas e cada unha das súas obras.
Outros dos aplicativos de software libre que implanta o ITG e que poden integrarse co seu software de xestión son:
- Eclipse Birt, ferramenta de cadro de mandos e xestor de informes avanzados
- Factura electrónica
Segundo a propia web da ITG, "ITG asume desde o ano 1.999 o desenvolvemento de aplicacións de xestión con código aberto e ERP HGPyme é a terceira aplicación desenvolvida e tamén a máis completa, dando servizos a empresas e entidades vinculadas a diversos sectores de actividade".
